Tags-Rang

na pūchho un kī tasvīr-e-ḳhyālī kī sajāvaT ko
udhar dil rañg detā thā idhar ham rañg bharte the

nigāhoñ meñ haiñ kis ke āriz-e-gul-rañg ke jalve
ki duniyā gulistāñ-dar-gulistāñ ma.alūm hotī hai

khoTe haiñ tilā.ī rañg vaale
us sone ko bārhā kasā hai

ḳhush-bayānī ne kisī kī mujhe ḳhush-rañg kiyā
apnā kuchh aur hī andāz-e-bayāñ thā pahle

tah-ba-tah chaar sū ḳhush-rañg sadā raushan thī
mujh se pahle bhī koī jaise yahāñ thā pahle

ye aksar 'shād' rakhtī hai mujhe ḳhush rañg lamhoñ se
mirī tanhā.ī terī raunaq-e-mahfil se aage hai

gul-rañg-o-lāla-fām-o-shafaq-tāb-o-ḳhusha-izār
yak māh-e-nau se maañd hue sīm-tan tamām

piine se kar chukā thā maiñ tauba magar 'jalīl'
bādal kā rañg dekh ke nīyat badal ga.ī

duniyā se dar-guzar ki guzargah ajab hai ye
darpesh ya.anī 'mīr' hai jaanā jahāñ se bhī

shāḳhoñ kī lachak har fasl meñ hai saaqī kī jhalak har rañg meñ hai
sāġhar kī khanak har zarf meñ hai maḳhmūr to ho sarshār to ho

maiñ bhī is safha-e-hastī pe ubhar saktā huuñ
rañg to tum mirī tasvīr meñ bhar kar dekho

rañg aur nuur se rahe mahrūm
ham faqīroñ ke āstāñ tanhā

kabhī ham-rañg-e-zamīñ hai kabhī ham-dosh-e-falak
kohsāroñ se uchhaltā huā dariyā dekho

ḳhayāl rañg huā chāñdnī shafaq ḳhushbū
hazār rañg meñ dekhūñ maiñ sūrateñ us kī

na badalnā thā na badlā dil-e-shaidā apnā
rañg har vaqt badaltī rahī duniyā apnā

jadīd rañg se maddham huā na rañg-e-kuhan
qadīm rañg meñ vo rañg bhar ga.e ham bhī

ik umr se be-nūr hai ye mahfil-e-hastī
'ejāz' koī rañg to bharnā hī paḌegā

har shaḳhs ko ā.eñge nazar rañg sahar ke
ḳhurshīd kī kirnoñ ko bikharnā hī paḌegā

rañg laa.ī hai hasrat-e-tāmīr
gir rahī haiñ imārateñ kyā kyā

ghar kī bosīdgī chhupāne ko
rañg dīvār-o-dar meñ bharte haiñ