Tags-Rang

lafz-o-ma.anī se alag hai mire ehsās kā rañg
ho sake tum se to andāz-e-bayāñ ko samjho

tum samajhte hī nahīñ rañg-e-shikasta kī zabāñ
kaun kahtā hai ki tum merī fuġhāñ ko samjho

ye jo rañg-e-fikr-o-ḳhayāl hai ye tirī nazar kā kamāl hai
tirā husn thā koī aa.ina jise dekh kar maiñ sañvar gayā

kitne ḳhush-rañg badan dhuul hue
vaqt kī chaal magar baaqī hai

vāh-vāh kyā rañg badlā gulshan-e-ījād kā
sāya-e-gul par gumāñ hone lagā sayyād kā

mausam-e-roz-o-shab tamām bhī ho
ye tilismāt-e-rañg-o-bū kab tak

baḳhshā hai tū ne merī vafā ko ḳhud apnā rañg
varna mirī nigāh meñ koī sila na thā

ab āñkhoñ meñ ḳhuuñ dam-ba-dam dekhte haiñ
na pūchho jo kuchh rañg ham dekhte haiñ

tālibān-e-rañg-o-bū kāñToñ se dāman-kash na hoñ
shāḳh-e-gul tak yuuñ kisī kā haath jā saktā nahīñ

āñkhoñ meñ na.e rañg sajāne nahīñ utre
ik umr huī ḳhvāb suhāne nahīñ utre

āsmāñ hai samundar pe chhāyā huā
is liye rañg paanī kā niilā huā

kirm-ḳhurda kashtiyāñ bīnā.ī kī haiñ tah-nashīñ
nam havā se ustaḳhvānoñ meñ utartā rañg hai

jaane kin chehroñ kī lau thī jaane kis manzar kī aag
niiñd kā resham dhuāñ hai ḳhvāb sho.ala-rañg hai

ab DhūñD aur qadr-shanāsān-e-rañg-o-bū
ham ne ye kaam ai gul-e-tar band kar diyā

us ke chehre ke sāmne 'farhat'
rañg aur raushnī bhī zaa.il haiñ

zamāna yaad rakkhegā tumheñ ye kaam kar jaanā
kisī afsurda chehre meñ ḳhushī ke rañg bhar jaanā

nizām-e-barq-o-nasheman se har samāñ badlā
magar ye dekh kabhī rañg-e-bāġhbāñ badlā

ġham ḳhushī rañg zindagī ke haiñ
raat bin din nayā nahīñ hotā

jām-e-ḳhush-rañg tahī hai mujhe ma.alūm na thā
apnī TuuTī huī tauba pe hañsī aa.ī hai

rañg-e-fitrat ne banāyā hai jo majzūb-e-qimāsh
manzar-e-ālam-e-nairañg-e-bayābāñ samjhā