Tags-Rang

shahr kī rañgā-rañg nigāro dil vāloñ kī qadr karo
mahfil meñ donoñ jalte haiñ sham.a bhī parvāna bhī

zindagī ik manchale gabrū kā ruup
zindagī nau-ḳhez doshīza kā rañg

jām-e-mai daur meñ lā charḳh-e-kuhan kī sūrat
dekhtā hai jo tujhe rañg nayā ai vaa.iz

rafta rafta mausamoñ ke rañg yuuñ bikhre ki bas
hai mire andar koī zinda magar TuuTā huā

rā.egāñ jaatā hai kab ulfat meñ dīvānoñ kā ḳhuuñ
rañg laatā hai kisī din in ke armānoñ kā ḳhuuñ

chāhā thā ki un kī āñkhoñ se kuchh rañg-e-bahārāñ le liije
taqrīb to achchhī thī lekin do aañkh milānā bhuul ga.e

zaḳhm-e-hunar ke chāhne vaale nahīñ rahe
ḳhush-rañg shohratoñ ke ḳharīdār rah ga.e

ab ke gulshan meñ ajab rañg se aa.ī hai bahār
shāḳh-e-gul par bhī hameñ ḳhaar nazar aate haiñ

maiñ raakh ho gayā tā.ūs-e-rañg ko chhū kar
ajiib raqs thā dīvār-e-pesh-pā se udhar

maiñ aag dekhtā thā aag se judā kar ke
balā kā rañg thā rañgīni-e-qabā se udhar

ġhubār-e-rañg-e-parrāñ hai pharerā terī rāyat kā
shikast-e-qalb-e-āshiq ġhalġhala hai terī nusrat kā

banegī baat bhalā kis tarah vahāñ 'ma.asūm'
anā kā rañg jahāñ iltijā meñ shāmil hai

hijr kī raat ajab rañg hai paimāne kā
dast mai-ḳhvār meñ bujhtā sā diyā ho jaise

mire hāthoñ meñ ḳhuun malo to zarā tumhīñ dekho to rañg dikhātā hai kyā
karo aaj numūd-e-shahīd-e-adā tumheñ shoḳhi-e-rañg-e-hinā kī qasam

ye bhī kyā rañg hai ai nargis-e-ḳhvāb-ālūda
shahr meñ sab tire jaadū ke haiñ maare hue log

aah vo vālid-e-be-zar kī javāñ beTī ke
suune hāthoñ ke liye rañg-e-hinā māñge hai

zard peḌoñ pe nayā rañg zarā aane de
is taraf bhī na.e mausam kī havā aane de

vaqt kā rañg badalte nahīñ dekhā tum ne
sūrat-e-gardish-e-ayyām tumheñ kyā ma.alūm

maiñ aks huuñ tire pairāhan-e-gul-o-mul kā
maiñ ek rañg huuñ barg-e-saman meñ rahtā huuñ