Tags-Rang

badle hue se lagte haiñ ab mausamoñ ke rañg
paḌtā hai āsmān kā saayā zamīn par

ham jaleñge ki tire naam kī lo raushan ho
ham ba-har-rañg tirī ziist kā sāmāñ hoñge

sūrat meñ rañg-o-nūr kii, phūloñ kii, ham kahīñ
lauh-e-jahāñ pe harf-e-mukarrar bhī ā.eñge

ek nā-shukre chaman ko rañg-o-bū detā rahā
aa gayā haañ aa gayā kāñToñ meñ rahnā aa gayā

tire hañsne se kaliyoñ ke hasīñ rañg-e-tabassum meñ
ye qatre ḳhūn-e-armāñ ke chhiTak jaa.eñ to achchhā hai

merā to ik rañg badan hai
un ke liye hai jiyālā patthar

parchhā.iyoñ kī baat na kar rañg-e-hāl dekh
āñkhoñ se ab havā-o-havas kā ma.aal dekh

rañg-e-chaman ko dekh kar 'ārif'-e-ḳhasta-dil ye kyā
phūloñ pe hai kabhī nazar kāñToñ pe hai kabhī nazar

kabhī ishq karo aur phir dekho is aag meñ jalte rahne se
kabhī dil par aañch nahīñ aatī kabhī rañg ḳharāb nahīñ hotā

humak humak itrātī chiḌiyāñ
apne rañg dikhātī chiḌiyāñ

kal bhī ruḳh-e-hayāt par rañg-e-shaguftagī na thā
sub.h-e-bahār-e-zindagī shām-e-ḳhizāñ hai aaj bhī

vābasta-e-bahār ho ḳhud misl-e-rañg-o-bū
yuuñ zindagī guzār kisī gul-e-badan ke saath

be-āb-o-rañg manāzir kī is masāfat meñ
nazar kī pyaas bujhāne ko jhiil koī nahīñ

kuchh yuuñ hī zard zard sī 'nāhīd' aaj thī
kuchh oḌhnī kā rañg bhī khiltā huā na thā

dast-e-ḳhayāl-e-yār se phūTe shafaq ke rañg
naqsh-e-qadam bhī rañg-e-hinā ke sivā na thā

tamām āb-o-havā meñ gulāl bikhrā hai
ki rañg laayā hai us ke nikhār kā mausam

rañg paatā hai mire ḳhūn-e-jigar se gul-e-sher
sabza-e-fikr mirī aañkh se nam letā hai

nāma-e-a.amāl abhī be-rañg hai
chaar din kī chāñdnī jaa.e na Dhal

ulajh kar rañg-o-bū meñ ishq kī ma.asūm sī bachchī
miThā.ī kī dukānoñ meñ jalebī thaam letī hai

ab zamīñ kyuuñ tere naqshe se nahīñ haTtī nazar
rañg kyā koī bachā hai is meñ bharne ke liye