Tags-Raqeeb

raqīb o sheva-e-ulfat ḳhudā kī qudrat hai
vo aur ishq bhalā tum ne e'tibār kiyā

pūchhā thā bevafā to na paayā raqīb ko
maiñ ne bhī kis maze se kahā hai ki jī nahīñ

shab mujh se aañkh maltī rahī dil raqīb se
yahāñ yuuñ sitam rahā ki kisī par ayaañ na thā

be-mehr yuuñ na ho ki ye ḳhush ho ke maiñ kahūñ
shāyad ki tū raqīb pe bhī mehrbāñ na thā

de kar mai-e-do-ātisha us se lipaT gayā
do āñchoñ meñ raqīb kī kyā daal gal ga.ī

rañg-e-vafā uḌā dil-e-saḳht-e-raqīb se
botal meñ ye sharāb na Thahrī ubal ga.ī

roz-e-avval se hai fitrat kā raqīb ādam-zād
dhuup niklī to mire jism se saaya niklā

dil-e-zūd-ranj na kar gila kisī garm o sard raqīb kā
ruḳh-e-nā-sazā to hai rū-ba-rū pas-e-nā-sazā koī aur hai

asar kiyā tapish-e-dil ne āḳhir us ko bhī
raqīb se bhī mirā zikr ġhā.ebāna huā

jalā rahe sham-e-bazm sā.īñ uThā ke pahlū se apne ham ko
raqīb ko misl-e-dil baġhal meñ miyān-e-mahfil biThālte haiñ

ab ghūrne se fā.eda bazm-e-raqīb meñ
dil par chhurī to pher chuke be-ruḳhī se aap

haañ haañ tirā raqīb se be-shak hai rabt-zabt
rutba yaqīn kā hai ziyāda gumān se

bahe raqīb ke aañsū bhī mere gāloñ par
ye sāneha bhī mohabbat meñ pesh aayā hai

mirā raqīb mujhī sā rakhā diyā mujh ko
nikālī chheḌ kī shakl aa.ina dikhā ke mujhe

mujh ko rotā huā dekheñ to jhulas jaa.eñ raqīb
aag paanī meñ bhī ai soz-e-jigar paidā kar

ilāhī merī jigar-fagārī raqīb sun kar unheñ sunā deñ
vo maslahat hī samajh ke aa.eñ dikhāne ko māhtāb-e-āriz

mehr tum soḳhta maiñ shīsha-e-ātish hai raqīb
us pe Dāloge tajallī to maiñ jal jā.ūñgā

rashk-e-raqīb ho ki ġham-e-dūrī-e-habīb
jo vaqt par nasīb huā ham ne khā liyā

kaun jaane ye tirā shā.er-e-āshufta-e-mizāj
kitne maġhrūr ḳhudāoñ kā raqīb aaj bhī hai

vo jo bigḌe raqīb se 'hasrat'
aur bhī baat ban ga.ī dil kī