Tags-Raqeeb

ba.ad-e-fanā bhī saaf nahīñ dil raqīb se
gumbad khaḌā huā hai lahad par ġhubār kā

shīsha us kā ajiib hai ḳhud hī
vo hamārā raqīb hai ḳhud hī

raqīb naam na le ishq kā jatā denā
ye shola vo hai jalā kar kabāb kar degā

apnā kiina banūñ ki yād-e-raqīb
kis tarah us ke dil meñ jā kiije

ho raqīb-e-murda-shau par ho na kyuuñ raushan-bayāñ
yaañ charāġh-e-gor-o-sham-e-anjuman donoñ haiñ ek

maiñ siyah-baḳht aur raqīb-e-rū-siyāh ham-rañg haiñ
qiir tere paas aur mushk-e-ḳhutan donoñ haiñ ek

pata raqīb kā de jām-e-jam to kyā hogā
vo phir uThā.eñge jhūTī qasam to kyā hogā

ham ko hastī raqīb kī manzūr
phuul ke saath ḳhaar hai apnā

tire zulm aur sitam sahe tire jāñ-nisār bhī ham rahe
na raqīb jis ko har ik kahe ki tirī jafāoñ se Dar gayā

ghar par raqīb-e-ḳhāna-bar-andāz ke 'razā'
hogā agar tū yaar hamārā na jā.egā

fātiha ke liye aayā thā vo hamrāh raqīb
ḳhuub dī us ne mohabbat kī sazā mere ba.ad

rahā raqīb se hujjat meñ 'qādrī' masrūf
magar vo le ke tumhārī ḳhabar nahīñ aayā

raqīb ko paas gar biThāyā to mujh se hargiz na zabt hogā
miTā hī duuñ ek din ye jhagḌā bas ab to dil meñ yahī Thanī hai

milne na degā ham se tujhe ek-dam raqīb
pīchhe lagā phire hai vo bad-zāt be-tarah

āvāza-e-raqīb se uljhe haiñ baar baar
tujh se shikāyatoñ kā magar hausla na thā

vo habīb ho ki rahbar vo raqīb ho ki rahzan
jo dayār-e-dil se guzre use ham-kalām kar lo

itne qarīb ho ga.e apne raqīb ho ga.e
vo bhī 'adīm' Dar gayā ham bhī 'adīm' Dar ga.e

ba-rañg-e-sāya o ḳhurshīd ai 'bayāñ' maiñ ne
kabhū raqīb se us ko judā nahīñ dekhā

tābinda o javān to baḳht-e-raqīb the
ham tīra-roz kyuuñ ġham-e-hijrāñ ko bhā ga.e