Tags-Raqeeb

sarshār-e-be-ḳhudī the 'asar' bazm-e-yār meñ
kyā jāneñ ham raqīb kahāñ thā kahāñ na thā

bigḌe hue raqīb se vo aa.e mere ghar
is husn-e-ittifāq kā koī gumāñ na thā

abhī thoḌe din kā hai tazkira ki raqīb kahte the barmalā
mire aage tum ko burā-bhalā tumheñ yaad ho ki na yaad ho

mujh se raqīb-o-la.īñ jiiv meñ rakhtā hai kiiñ
us sag-e-nāpāk suuñ ḳhuub nahīñ bolnā

ḳhvāhish-e-dīdār meñ āñkheñ bhī haiñ merī raqīb
saat pardoñ meñ chhupā rakkhā hai us ke nuur ko

dushman ke kaam karne lagā ab to dost bhī
tū ai raqīb darpai-e-āzār hai abas

ham dekheñ maze raqīb luuTe
yuuñ us se bhī to kyā mazā hai

luuTe maze jo ham ne tumhāre ugaal ke
mar mar ga.e raqīb lahū Daal Daal ke

aap kī majlis-e-ālī meñ alarraġhm raqīb
ba-ijāzat ye gunahgār uThe aur baiThe

maiñ to fasurda huuñ hī lekin ashk raqīb kī aañkh meñ bhī haiñ
ek mahāz pe haare haiñ ham ye rishta kyā kam rishta hai

raqīb-e-ḳhvāhish-e-maujūda sun liyā tū ne
chaman bahut haiñ magar koī dekhtā nahīñ hai

saare jo ġham-gusār the kab ke raqīb ban chuke
aise meñ dostoñ koī apnā ye ġham sunā.e kyuuñ

mujhe nigāh-e-taġhāful raqīb par altāf
adā-e-maslahat-āmez ne ġhulām kiyā

ye kah ke mere sāmne Taalā raqīb ko
mujh se kabhī kī jaan na pahchān jā.iye

afsos shikāyat-e-nihānī na ga.ī
dil par se raqīb kī girānī na ga.ī

tum ne vahāñ raqīb ko pahlū meñ dī jagah
yaañ rah gayā taḌap ke dil-e-ārzū-pasand

apnī zabān se mujhe jo chāhe kah leñ aap
baḌh baḌh ke bolnā nahīñ achchhā raqīb kā

us kī mahfil se kab uThegā raqīb
ye sa.ādat-bhare qadam le kar

shauq har rañg raqīb-e-sar-o-sāmāñ niklā
qais tasvīr ke parde meñ bhī uryāñ niklā