Tags-Raqeeb

pas-e-parda dil kā rafīq thā sar-e-parda merā raqīb thā
maiñ miyān-e-radd-o-qubūl thā ki vo aa ke parda haTā gayā

vo banāo karne haiñ baiThte to sabhoñ se lete haiñ ḳhidmateñ
kabhī mal dī missī raqīb ne kabhī surma maiñ ne lagā diyā

tumhāre ḳhat meñ nayā ik salām kis kā thā
na thā raqīb to āḳhir vo naam kis kā thā

jā.ūñ kyā ek to darbān hai aur ek raqīb
jaan lene ko farishte haiñ vahāñ do baiThe

dil galī meñ raqīb dil kā julūs
vaañ to talvār chal ga.ī hogī

mujhe raqīb samajh kar jo mere mohsin haiñ
mirī nazar kā hasīñ intiḳhāb chāhte haiñ

raqīb ab vo hamāre haiñ jinhoñne
namak tā-zindagī khāyā hamārā

maiñ muztarib huuñ vasl meñ ḳhauf-e-raqīb se
Daalā hai tum ko vahm ne kis pech-o-tāb meñ

ba-īñ gudāz ajab rañg kā bayāñ hotā
koī raqīb jo apne bhī darmiyāñ hotā

kuchh un se kahne ko baiThe the ham ki ḳhalvat meñ
raqīb aa hī gayā marg-e-nā-gahāñ kī tarah

qayāmat aa.ī shab-e-vasl mere ghar ke paas
raqīb ne use āvāz dī azaañ kī tarah

ronā hai ye ki aap bhī hañste the varna yaañ
ta.an-e-raqīb dil pe kuchh aisā girāñ na thā

hamāre yaar ke kuchh darmiyāñ jo baat bol uTThe
raqīb-e-rū-siyah ġhammāz yā shaitān hai kyā hai

tum aur fareb khaao bayān-e-raqīb se
tum se to kam gila hai ziyāda nasīb se

be-mehr yuuñ na ho ki ye ḳhush ho ke maiñ kahūñ
shāyad ki tū raqīb pe bhī mehrbāñ na thā

shab mujh se aañkh maltī rahī dil raqīb se
yahāñ yuuñ sitam rahā ki kisī par ayaañ na thā

huī sar-gashta ḳhaak apnī ġhubār-e-kārvāñ ho kar
mujhe qismat satātī hai raqīb-e-kāmrāñ ho kar

ābād kū-e-chāk-e-garebāñ jo phir huā
dast-e-raqīb o dāman-e-ahbāb dekhnā

tirī zabāñ ko bigāḌā raqīb-e-bad-ḳhū ne
ki baat baat meñ gaalī to thī na ḳhū terī

mire aage us ko faroġh ho ye majāl kyā hai raqīb kī
ye hujūm-e-jalva-e-yār hai ki charāġh-e-ḳhāna ko jā nahīñ