Tags-Raushni

siyāh dil haiñ añdheroñ meñ tujhe ham yaad karte haiñ
ḳhudāyā un gharoñ meñ raushnī hotī to achchhā thā

mujhe jab tak talāshā raushnī ne
maiñ puurā tīrgī kā ho chukā thā

ḳhud kā hī nuur kiyā kartā hai raushan dil ko
raushnī tujh ko bhalā kaise deñ ġhairoñ ke charāġh

merā fan goyā hai 'jāmī' raushnī kā ham-safar
merī ġhazloñ meñ nihāñ hai ruuh ke zaḳhmoñ kī guuñj

mujh ko pahlū meñ vo dil chāhiye jis meñ 'shā.ir'
raushnī sham.a kī ho soz ho parvānoñ kā

āñdhī ne raushnī kī himāyat to kī bahut
lekin koī charāġh jalāne nahīñ diyā

tire dayār se zarroñ ne raushnī paa.ī
tire dayār meñ ham sogvār phirte haiñ

Duub jaa.e jab kabhī tārīkiyoñ meñ raushnī
ik diyā siine meñ phir us kī navā raushan kare

raushnī dil kī achānak gul huī
ḳhud ko thoḌī der meñ andhā lagā

laatī hai jab sabā to chamakte haiñ bām-o-dar
ye raushnī sī kyā tirī bū-e-qabā meñ hai

ye alamiya hai chamakte jagmagāte daur kā
raushnī hote hue bhī ham ujāle meñ nahīñ

har ek aag ko vo raushnī samajhtā hai
maiñ chuuk jā.ūñ to vo uñgliyāñ jalā legā

ḳhush-āmdīd na.ī raushnī ko kyuuñ kahtī
hamārī qaum qadāmat-parast aisī thī

ḳhabar rihā.ī kī mil chukī hai charāġh phūloñ ke jal rahe haiñ
magar baḌī tez raushnī hai qafas kā dar sūjhtā nahīñ hai

raushnī bechne vaale ye ujāloñ ke safīr
bastiyāñ phūñk ke ġhamnāk huā chāhte haiñ

qadr-o-qīmat in añdheroñ kī na pūchho mujh se
raushnī ghar meñ charāġhoñ ke jalāne se huī

jī dekhne ko tarse dekhūñ to kis nazar se
tūfān-e-ḳhīrgī hai jalvoñ kī raushnī meñ

nazar uThā.ī to duur dhundlī fazāoñ meñ
raushnī kā ik dā.era sā dekhā

nikle log safar par shab ke jañgal meñ
raushnī bhar de kirnoñ vaale pal pal meñ

kabhī to muuñd leñ āñḳheñ kabhī nazar kholeñ
kisī tarah se koī raushnī kā dar kholeñ