Tags-Raushni

sard-o-shādāb havā ruk ga.ī kohsāroñ kī
raushnī ghaT ga.ī do-chār ghaḌī tāroñ kī

kahīñ thī raushnī matlūb aur kahīñ raunaq
kahīñ charāġh kahīñ qumqume banāne paḌe

us ne sūraj ke muqābil rakh diye apne charāġh
vo ye samjhā is tarah kuchh raushnī baḌh jā.egī

mere dāġh-e-dil se hai raushnī isī raushnī se hai zindagī
mujhe Dar hai ai mire chāra-gar ye charāġh tū hī bujhā na de

ye to huā ki raushnī aur bhī kuchh bhaḌak uThī
tez havā ke bāvajūd dil kā diyā bujhā nahīñ

maut chamkī kisī shamshīr-e-barhana kī tarah
raushnī dil meñ utartī huī dekhī ga.ī hai

jalāo ḳhūn-e-dil mahfil meñ jab kuchh raushnī hogī
añdherā har taraf chhāyā huā hai bazm-e-jānāñ ke

raushnī thī aañkh thī manzar thā phir kuchh bhī na thā
haa.e kis āshob ko apnī nazar samjhā thā maiñ

ziyā-e-shams bhī maujūd hai nūr-e-qamar bhī hai
basīrat hī na ho to raushnī se kuchh nahīñ hotā

ye shabnam phuul taare chāñdnī meñ aks kis kā hai
sunahrī dhuup chhāñv raushnī meñ aks kis kā hai

koī hai rañg koī raushnī koī ḳhushbū
judā judā hai ta.assur har ek lamhe kā

raah meñ us kī jalā.e the umīdoñ ne charāġh
raushnī kī thī kidhar phail ga.ī chehre par

sabz niilī dhund meñ Duube pahāḌoñ se utartī
kyā ajab manzar-ba-manzar raushnī hai dāstānī

mile jo raushnī tujh se to zulmateñ kam hoñ
ki tere ba.ad mirī jaan zindagī na rahe

batāo aisā bhī manzar nazar se guzrā hai
charāġh jalte raheñ aur raushnī na rahe

ajab hai zauq-e-tamāshā ki ghar jalā kar log
ye chāhte haiñ samajhnā ki raushnī kyā hai

kyā charāġhoñ kā tazkira karnā
raushnī ghuT ke mar ga.ī mire dost

raushnī bhī hai is añdhere meñ
ḳhāmushī hai sadā bhī aatī hai

likhī ga.ī hai mirī sub.h ke muqaddar meñ
vo raushnī jo kiran kā libās chhoḌ ga.ī

shab-e-asia ke añdhere meñ sar-e-rāh jis kī thī raushnī
vo gauhar kisī ne chhupā liyā vo diyā kisī ne bujhā diyā