Tags-Raushni

tumhāre jalvoñ kī raushnī meñ nazar kī hairāniyāñ musallam
magar kisī ne nazar ke badle jo dil āzmāyā to kyā karoge

mirī ḳhaak meñ tirī saañs hai tirī raushnī mire paas hai
mujhe dil diyā sanam-āshnā mirā sar jhukā hai namāz meñ

nuzūl-e-barq hai shāyad ye āshiyānoñ par
tū raushnī jise samjhā hai raushnī to nahīñ

baiThe rahne se to lau dete nahīñ ye jism-o-jāñ
jugnuoñ kī chaal chaliye raushnī ban jā.iye

tā.ir-e-ḳhasta kī sūrat aap ko dekhā karūñ
shāḳh-e-sidra se utartī raushnī ban jā.iye

nayā zamāna jo duniyā ko raushnī baḳhshe
har aadmī ko na.ī ek zindagī baḳhshe

daaġh siiñ kyuuñ na dil ujālā ho
chashm kī raushnī siyāhī hai

chāndnī mudām ho raushnī tamām ho
vasl meñ qayām ho hijr meñ dayār kar

gahrī ā.ankhoñ meñ ye kaisī hai bichhaḌtī mahfiloñ kī raushnī
ajnabī logoñ meñ dekhī maiñ ne apne dostoñ kī raushnī

ab to us kā dard bhī 'ajmal' samundar kī tarah gahrā nahīñ
is jazīre meñ bhaTaktī hai akele sāhiloñ kī raushnī

maiñ ne us ko ḳhvāb meñ dekhā to vo ik aur hī duniyā meñ thā
us ke har jānib bikhartī jā rahī thī rat-jagoñ kī raushnī

us ke mere darmiyāñ pākīzgī kā raqs to hotā nahīñ
ek parde kī tarah rahtī hai nañgī ḳhvāhishoñ kī raushnī

manziloñ par vo pahuñch kar bhī abhī tak manziloñ jaisā nahīñ
us kī sochoñ se bañdhī hai rāste ke manzaroñ kī raushnī

raushnī hī raushnī hai shahr meñ
phir bhī goyā tīrgī hai shahr meñ

zamīñ kī sham.oñ se jab dil ko raushnī na milī
falak se chāñd sitāre utaar laayā maiñ

zaat ke ġhāroñ meñ chhup kar hī koī bahlā.e hai
raushnī meñ jism kī ḳhvāhish mujhe le aa.e hai

aas hī se dil meñ paidā zindagī hone lagī
sham.a jalne bhī na paa.ī raushnī hone lagī

kise ḳhabar thī ki ḳhud raushnī ko tarsegā
charāġh-e-ishq jalāyā thā raushnī ke liye

zarā havāoñ ke ruḳh par bhī ik nazar Dāleñ
charāġh DhūñD rahe haiñ jo raushnī ke liye

tum farozāñ ho ik sitāre se
mere andar hai raushnī merī