Tags-Raushni

samajh rahe the ki ab shab ga.ī sahar aa.ī
tire dayār meñ vo raushnī nazar aa.ī

zulmat kā daur kuchh bhī sahī satr-posh thā
kab raushnī ne jeb-o-garebāñ diyā hameñ

terā ḳhayāl, terī talab terī aarzū
maiñ umr bhar chalā huuñ kisī raushnī ke saath

sab ne milā.e haath yahāñ tīrgī ke saath
kitnā baḌā mazāq huā raushnī ke saath

jaage zamīr zehn khule tāzgī mile
chhūTe gahan ki mujh ko mirī raushnī mile

machalte raheñ raushnī ke patañge
diye mere kājal ugalte raheñge

nahīñ hai farq añdhere meñ aur ujāle meñ
nazar na aa.e jahāñ to vo raushnī kyā hai

husain naam hai ik raushnī ke paikar kā
husain fikr-e-bashar kī aziim manzil hai

vo le ga.e haiñ chāñd-sitāroñ kī raushnī
kahte rahe fasāna-e-ġham āsmāñ se ham

gilā muaaf magar maiñ jahāñ paḌā huā huuñ
mire charāġh tirī raushnī udhar kam hai

nazar gum ho ga.ī jalvoñ meñ 'ārif'
añdherā kar diyā hai raushnī ne

ghar se bāhar raushnī thī muntazir
kaise kaise ḳhushnumā manzar liye

ḳhayāl ko zau nazar ko tābish nafas ko raḳhshandagī milegī
bhaḌak uThā soz-e-ġham jo dil meñ to har kahīñ raushnī milegī

ġham-o-musarrat mileñge bāham to zindagī bhī chamak uThegī
ye rū hai manfī ye rū hai musbat milegī ye raushnī milegī

nigāh jitnī bulandī hogī ye utnī hī arjumand hogī
ba-qadr-e-qurb-e-falak kiran meñ harārat-o-raushnī milegī

bujhtī āñkhoñ kī raushnī to dekh
chashm meñ tairtī namī to dekh

raushnī aane vaale ḳhvāb kī hai
din to kab kā guzar chukā mujh meñ

'badr' aap aur ḳhayāl bhī us kā
saaya kab raushnī se miltā hai

'badr' jab āgahī se miltā hai
ik diyā raushnī se miltā hai

bazm meñ dekh rañg-e-āmad-e-dost
raushnī thartharā.ī jaatī hai