Tags-Raushni

jo raushnī kā nagar kabhī thā vo aaj añdheroñ meñ gum huā hai
ujaaḌ añdherī udaas vīrāñ imārateñ kyā shumār karnā

raushnī apne gharoñdoñ meñ chhupī thī varna
shahr ke shahr pe shab-ḳhūn na maarā jaatā

kārvān-e-sub.h yaaro kaun sī manzil meñ hai
maiñ bhaTaktā phir rahā huuñ raushnī ke naam par

samajh liyā thā jinheñ maiñ ne raushnī kā safīr
vo āstīn meñ ḳhanjar chhupā ke laa.e the

añdherī raat kā manzar bhī ḳhuub thā lekin
tum aa ga.e to charāġhoñ meñ raushnī kar lī

ghaT gayā chāñd raushnī maddham
merī āñkhoñ meñ raushnī kā dukh

paḌos vālo! darīchoñ ko mat khulā chhoḌo
tumhāre ghar se bahut raushnī nikalne lagī

aql kī kuchh kam nahīñ hai rahbarī mere liye
har taraf light hai har-sū raushnī mere liye

ik sadā kī sūrat ham is havā meñ zinda haiñ
ham jo raushnī hote ham pe bhī jhapaTtī raat

mirī āñkhoñ ke liye raushnī se hai baḌh kar
tirī zulfoñ kī siyāhī jo hai gahrī shab se

bhiiḌ ham jaisoñ kī rahtī hai hamesha yuuñ to
raushnī hotī hai mahfil meñ bas ik kaukab se

aisā manzar to kabhī dekhā na thā
raushnī meñ bhī mirā saaya na thā

ek vahdat thī aap hī bikhrī
jaane kis ġham meñ raushnī bikhrī

dekho tum aaj mujh ko bujhāte to ho magar
kal DhūñDhtī phiregī bahut raushnī mujhe

utar saktī nahīñ dil-ā.ine meñ raushnī jab tak
ham us se saaf saarī gard-o-ālā.ish nahīñ karte

raushnī kuchh to mile jañgal meñ
aag lag jaa.e ghane jañgal meñ

saare chaqmāq-badan aa.e the tayyārī se
raushnī ḳhuub huī raat kī chiñgārī se

mujh meñ phailī huī tārīkī se ghabrā ke koī
raushnī dekh ke mujh meñ se nikal paḌtā hai

aap ko miltī rahegī raushnī
dil hamārā yuuñ hī jaltā jā.egā

ḳhushī kī sham.a to ai dost zad meñ aa bhī jaatī hai
magar dāġh-e-jigar kī raushnī maddham nahīñ hotī