Tags-Raushni

maiñ huā bhī to ek din raushan
apne andar kī raushnī se huā

vahāñ par bhī charāġh-e-ārzū ham ne jalā.e haiñ
jahāñ se raushnī bhī sar jhukā kar lauT jaatī hai

tire falak hī se TūTne vaalī raushnī ke haiñ aks saare
kahīñ kahīñ jo chamak rahe haiñ hurūf merī ibāratoñ meñ

raushnī chhā.ī huī rahtī hai ab mujh pe 'tarāz'
koī to hai jo ināyat se mujhe dekhtā hai

raushnī kī zabān meñ 'dānā'
vo charāġhoñ se baat kartā hai

rañg ho raushnī ho yā ḳhushbū
sab meñ partav usī hasīñ ke haiñ

le ke aayā thā mere liye raushnī
jab gayā chhoḌ kar maiñ ne dekhā nahīñ

mirī āñkhoñ se le le raushnī aur nuur kar de
kisī qīmat pe mālik manzar-e-shab-tāb utre

raushnī thī to ka.ī saa.e nazar aate the
tīrgī hai to yahāñ koī nahīñ mere sivā

qatār jugnuoñ kī raushnī luTātī rahī
maiñ rañg gūñdh ke titlī ke par banātī rahī

milī thī rāh-e-havas meñ jo raushnī 'sāqī'
vo ek zulmat-e-rahzan thī raushnī to na thī

tamām umr jise raushnī samajhte rahe
fareb-e-chashm-e-tamannā thā raushnī to na thī

'īmān' kī shuā.eñ jalva-numā hoñ jis dam
mīnār raushnī kā ho raushnī se dāman

dhundlā dhundlā hī sahī rasta dikhā.ī to diyā
aaj kā din hai ġhanīmat raushnī jaisī bhī hai

raushnī kī vo chakā-chauñdh thī āñkhoñ meñ ki ham
shahr se nikle to sahrā bhī dikhā.ī na diyā

haar jā.egī yaqīnan tīrgī
gar musalsal raushnī zinda rahī

dikhā.ī detī hai pahle to raushnī ghar kī
nafī meñ sar ko hilātā hai phir ḳhayāl koī

maiñ jāntā thā mujhe raushnī vadī.at hai
maiñ jāntā thā mire haath meñ qalam hogā

kabhī jal jaate the rāhoñ meñ lahū ke bhī charāġh
raushnī par koī pahrā to nahīñ thā pahle

ik sāneha ki raushnī kartā hai chār-samt
ik lau ki chhoḌtī nahīñ tāsīr ek pal