Tags-Raushni

raushnī kā qālib jab tīrgī meñ Dhaltā hai
ḳhvāhishoñ ke siine meñ merā dil machaltā hai

sahar huī shab-e-va.ada kā iztirāb gayā
sitāre chhup ga.e gul kar dī raushnī maiñ ne

yaqīñ vahī hai jo āġhosh-e-tīrgī meñ mile
savād-v-vahm meñ ham-sāya raushnī kā ho

ab kahāñ se aa.ī us kāfir ke dil meñ raushnī
aa.ina halqa-ba-gosh-e-yār pahle to na thā

ilm ko raushnī se kyā matlab
ye añdheroñ se dil-lagī hī to hai

raushnī ke liye phirte rahe dar dar ham log
koī dahlīz to mehrāb kā dhoka hotī

kaise makāñ ujaaḌ huā kis se pūchhte
chūlhe meñ raushnī thī na paanī ghaḌe meñ thā

raushnī chāhiye kuchh der zarā aur hameñ
chāñd ruk jaa.e yahīñ aur sitāre jaa.eñ

phir yuuñ huā ki raushnī nāzil huī vahāñ
phir dekhte hī khul gayā chaak qafas ki bas

basārat kho ga.ī hai raushnī meñ
maza aane lagā hai tīrgī meñ

raushnī phuuT niklī misroñ se
chāñd ko jab ġhazal meñ sochā hai

ik raushnī sī raah dikhātī hai har taraf
dosh-e-havā pe sāhib-e-raftār kaun hai

raushnī detī thī chamkīle badan kī tāzgī
varna maiñ chehre ke ḳhāl-o-ḳhad kā shaidā.ī na thā

ye raushnī jo dekhte ho tum jagah jagah
ham ne ye sab charāġh havā meñ jalā.e the

raat 'shāhīn'! āñkhoñ meñ kaTne lagī
is tarah gum huī raushnī shaam meñ

ye merī āñkheñ baḌī tez raushnī meñ khulīñ
maiñ chāhtā bhī to kyā dekhtā tumhāre ba.ad

kabhī raushnī kī talab rahī kabhī hausloñ kī kamī rahī
maiñ charāġh ko tire naam ke na jalā sakā na bujhā sakā

pūchhtī hai dastakeñ de de ke shorīda havā
kis kā ḳhema thā ki jis meñ raushnī paa.ī ga.ī

ruḳh havāoñ kā badalnā jānte haiñ log jo
bas unhīñ ke har diye meñ raushnī hai aaj bhī

use kahnā mohabbat to diloñ meñ raushnī bhar de
use kahnā mohabbat pattharoñ ko mom sā kar de