Tags-Raushni

na raushnī na harārat hī de sakā mujh ko
parā.ī aag meñ koī sharar na thā merā

inhī ġham kī ghaTāoñ se ḳhushī kā chāñd niklegā
añdherī raat ke parde meñ din kī raushnī bhī hai

bahut talab thī mujhe raushnī meñ aane kī
so yuuñ huā hai ki āñkheñ jalā.e baiThā huuñ

añdherī raat hai is tund-ḳhū se mat kahnā
vo raushnī ke liye apnā ghar jalā degā

ghane añdhere meñ raushnī kī kalī khilī hai bahut bhalī hai
ghuTan se dam TūTne lagā to havā chalī hai bahut bhalī hai

sarāb ban ke ḳhalāoñ meñ gum nazāra-e-samt
mujhe lagā ki ḳhalāoñ meñ raushnī kam hai

būḌhī raushnī ke piile nāḳhun
vo niile ḳhuun ke saath nigal ga.ī

abhī jalī to hai tahzīb-e-nau kī sham.a magar
abhī ye raushnī maddham hai tum na saath chalo

sūraj ne dhuul kirnoñ kī āñkhoñ meñ jhoñk dī
mat pūchh raushnī ne añdherā kiyā bahut

bujhīñ sham.eñ to dil jalā.e haiñ
yuuñ añdheroñ meñ raushnī kī hai

mushkil mirī hadoñ kā ta.ayyun hai 'āftāb'
vo raushnī bhī kyā hai ki jo chaar sū na ho

band kartā huuñ jo āñkheñ kyā kyā
raushnī sī nazar aatī hai mujhe

phūloñ kī dilkashī ho ki tāroñ kī raushnī
parchhā.iyāñ haiñ sab mire husn-e-ḳhayāl kī

sho.ala-e-mohabbat aur āb-e-ashk ai nādāñ
raushnī ko dariyā meñ kis liye girātā hai

itnī siyāh-rāt meñ itnī sī raushnī
ye chāñd vo nahīñ mirā mahtāb aur hai

ġhaur se dekh us kī āñkhoñ meñ
raushnī kā kamāl rakkhā hai

tirī yādeñ haiñ yā sūraj hai koī
ye āñkheñ bujh rahī haiñ raushnī se

ḳhud charāġhoñ ko andheroñ kī zarūrat hai bahut
raushnī ho to unheñ log bujhāne lag jaa.eñ

aao to mere sahn meñ ho jaa.e raushnī
muddat guzar ga.ī hai charāġhāñ kiye hue

farāham kar badan kī raushnī apnī ki mujh ko
rafū honā hai aur ye kaam hai bīnā.ī vaalā