Tags-Raushni

muddateñ huiiñ ab to jal ke āshiyāñ apnā
aaj tak ye aalam hai raushnī se Dartā huuñ

maiñ shāḳh shāḳh tirī nik.hateñ fuzūñ dekhūñ
maiñ taaq taaq tirī raushnī savā chāhūñ

maiñ raushnī ke biij bo ke so gayā
charāġh ug rahe haiñ kisht-e-ḳhvāb se

dil meñ tire ḳhayāl se yuuñ raushnī huī
jaise ki sub.h aa.ī ho pahlī kiran ke saath

harīm-e-dil, ki sar-ba-sar jo raushnī se bhar gayā
kise ḳhabar, maiñ kin diyoñ kī raah se guzar gayā

raushnī āñkhoñ meñ baaqī thī na thī
vo nazar meñ thā nazar aatā rahā

hujūm-e-ġham ke añdhere bhī dil meñ haiñ lekin
kisī kī yaad kī ujlī sī raushnī bhī hai

koī jaltā nahīñ charāġh vahāñ
raushnī phir bhī us makān meñ hai

āgahī kyā hai musalsal ḳhud-farebī kā chalan
raushnī kyā hai fareb mustaqil khāne kā naam

hamāre jalne se miltī hai raushnī tum ko
to raushan ab yahī qindīl karnā chāhte haiñ

safar thā jab raushnī kī jānib to phir ma.āl-e-safar kā kyā ġham
charāġh kī tarah saarī shab shaan se jale sub.h bujh ga.e ham

zindagī ke sahrā meñ ek chāñd kaafī hai
qumqumoñ kī kasrat se raushnī nahīñ hotī

bahut sukūn se rahte the ham añdhere meñ
fasād paidā huā raushnī ke aane se

ik patiñge ne ye apne raqs-e-āḳhir meñ kahā
raushnī ke saath rahiye raushnī ban jā.iye

kitnī andhī hai aarzū merī
kyā kabhī is meñ raushnī hogī

havā ne kar diyā pāmāl raushnī kā badan
charāġh-e-bām kā koī pata nahīñ miltā

suno hameñ hī jalā do ki raushnī ke liye
hamāre shahar ko koī diyā nahīñ miltā

lakḌiyoñ ke ghar meñ miTTī kā diyā achchhā nahīñ
raushnī ke badle is meñ aag lag jaa.e to phir

merā nahīñ hai aur na kisī aur hī kā hai
partav jahāñ kahīñ hai tirī raushnī kā hai

hai in kī raushnī mujh se bhī aage
maiñ achchhā mujh se achchhe kaam mere