Tags-Raushni

vo raushnī ki aañkh uThā.ī nahīñ ga.ī
kal mujh se merā chāñd bahut hī qarīb thā

mire vajūd ko apne meñ jazb kartī huī
na.ī na.ī sī koī raushnī hai aur maiñ huuñ

tumhāre lams ko maiñ jab kabhī mahsūs kartā huuñ
bahut halkī sahī ik raushnī mālūm hotī hai

sitāre misl jugnū zā.iche meñ raqs karte haiñ
zarā sī der meñ kuchh raushnī mālūm hotī hai

kījiye 'betāb' raushan apnī palkoñ par diye
raushnī darkār hai be-nūr kamroñ ke liye

raat kā pichhlā pahar mujh ko bashārat de gayā
aa rahī hai raushnī tārīk galiyoñ ke liye

har ek mausam meñ raushnī sī bikherte haiñ
tumhāre ġham ke charāġh merī udāsiyoñ meñ

usī kī raushnī rahtī hai is qadar mujh meñ
jo us ke lauT ke aane kī hai ḳhabar mujh meñ

vo jo tīrgī thī vo kaun thī
ye jo raushnī hai ye kaun hai

shāyad isī se ashk bhī āñkhoñ meñ aa ga.e
tārīkiyoñ ko dekh na leñ raushnī se ham

kah do shab-e-firāq ke tāroñ se Duub jaao
mānūs ab nahīñ haiñ kisī raushnī se ham

jo bujhī sham-e-dil to baḌhī raushnī jo piyā zahr-e-ġham to baḌhī zindagī
ye tū hī ab batā zarā munsifī ye tirā kaam thā ki mirā kaam thā

jis ko us ne raushnī samjhā thā merī dhuup thī
shaam hone kā mirī phir intizār us ne kiyā

maiñ vo raushnī kā nagar huuñ jahāñ
charāġhoñ ke chehre bhī kaale mile

'daurāñ' inhī ke zaḳhm se phūTegī raushnī
maanā ki sogvār haiñ mere yahāñ ke log

vo jis charāġh ke dam se makān raushan thā
usī charāġh ko ḳhud apnī raushnī na milī

hañsī thamī hai in āñkhoñ meñ yuuñ namī kī tarah
chamak uThe haiñ andhere bhī raushnī kī tarah

mere qisse pe vahī raushnī Daale shāyad
sham-e-kam-māya jo bujhtī hai sahar se pahle

ghup añdherā hai mere chāroñ-or
is meñ thoḌī sī raushnī kyā hai

nahīñ hai mere muqaddar meñ raushnī na sahī
ye khiḌkī kholo zarā sub.h kī havā hī lage