Tags-Raushni

musalsal ek hī tasvīr chashm-e-tar meñ rahī
charāġh bujh bhī gayā raushnī safar meñ rahī

kabhī tū ne sochā bhī sub.h-e-nau ki tamām raat guzār ke
jinheñ Das ga.ī tirī raushnī vo kahāñ vatan se chale ga.e

baḌā latīf añdherā hai raushnī na jalā
urūs-e-shab ko abhī ḳhush-libās rahne de

ka.aba o kāshī alāmat haiñ ḳhudā ke nuur ke
tum ġharīboñ ke gharoñ meñ raushnī paidā karo

toḌ do baḌh kar añdherī raat ke shaḌyañtr ko
kuchh nahīñ to ārzū-e-raushnī paidā karo

laag ho yā ki lagan ho donoñ ek diye kī laveñ
ek hī raushnī lahrātī hai pyaar aur bair ke biich

mire charāġhoñ vasiyyat to dekh lo merī
tumhāre hisse meñ likh dī hai raushnī maiñ ne

ghaTā ghaTā sā dhuñdlakā hai qasr-o-aivāñ meñ
nikal chalo jahāñ maidāñ meñ raushnī hai tez

phir na shab-ḳhūn kā vaqt aa.egā
raushnī un ke Thikānoñ meñ nahīñ

ye kaisī raushnī hai aur kin rāhoñ se aa.ī hai
yakāyak merī āñkhoñ meñ añdherā kyuuñ huā hai

vasl ke ḳhvāboñ meñ ab vo raushnī baaqī nahīñ thī
hijr kī rātoñ meñ sone kā natīja sāmne thā

dhund ke pare ik din
raushnī ke haale meñ

raushnī shaam kī sun paa.e na āvāza-e-shab
mohr-e-zartāb kā āfāq se paimāñ ho jaa.e

lagā hai aisā koī kāsa-e-savālī hoñ
ye aañkh jaise mirī raushnī se ḳhālī hoñ

charāġh agarche numā.inde raushnī ke haiñ
magar ye hai ki ye āsār tīrgī ke haiñ

gañvā.e baiThe haiñ āñkhoñ kī raushnī 'shāhid'
jahāñ-panāh kā insāf dekhne vaale

phir yuuñ huā ki raushnī had se sivā huī
ḳhurshīd-e-zau-fishār thā dekho bujhā huuñ maiñ

maiñ bujh rahā huuñ magar merī raushnī 'shahzād'
charāġh-e-ḳhema-e-idrāk se ziyāda hai

ai rūh-e-zindagī
ai avvalīn raushnī kī abadī lau

vus.at-e-aflāk meñ bhī nisbat-e-zohra kahāñ
TuuT kar bhī lamha bhar kī raushnī rah jā.ūñgī