Tags-Raushni

raushnī qatl huī
to jism ḳhālī ho ga.e

umr bhar mujh ko jalā ke sham-o-gul kyuuñ laa.e ab
dāġh-e-dil kī raushnī kyā mere madfan meñ nahīñ

raushnī tak raushnī kā rāsta kah lījiye
raat ko shām-o-sahar kā fāsla kah lījiye

vo udhar us paar ke manzar bulāte haiñ mujhe
raushnī ke shahr se pīchhā chhuḌā.ūñ kis tarah

mānūs raushnī huī mere makān se
vo jism jab nikal gayā resham ke thaan se

raushnī le ke aqīdoñ ke khañDar meñ
makr oḌhe sahī mahtāb to aayā

ġham-e-hayāt ko apnāo zindagī kar lo
ab āñkheñ khol do ik pal ko raushnī kar lo

āñsuoñ kī ho aur umr darāz
chāñd-tāroñ kī raushnī kyā hai

ye ġhazal ki jaise hiran kī aañkh meñ pichhlī raat kī chāñdnī
na bujhe ḳharābe kī raushnī kabhī be-charāġh ye ghar na ho

tirī mamlikat ke nisāb par koī tabsira bhī kare to kyā
vahī raushnī kā safīr hai jo asīr-e-zulmat-e-shab rahā

vo raushnī hī kyā jo basārat ko chhīn le
āñkhoñ ko ai ḳhudā mirī be-nūr tū na kar

yuuñ to chahār samt hai apne hisār-e-shab
ham tīrgī ko chhed ke laate haiñ raushnī

yalġhār kar rahā hai ik raushnī kā lashkar
tārīkiyoñ kī chādar phir chaak ho rahī hai

ye kor-chashm ujāloñ se ishq karte haiñ
jo ghar jalā ke bhī kahte haiñ raushnī hai nā

luuT le jaate haiñ sab dhanvān din kī raushnī
aur TukḌe TukḌe baT jaatī hai har nirdhan meñ raat

aur bhī daraḳhshāñ ho ai mire na.e sūraj
ab bhī mere āñgan meñ raushnī nahīñ aa.ī

ye kis hisāb se kī tū ne raushnī taqsīm
sitāre mujh ko mile māhtāb us kā thā

ghup-añdhere se letī hai kyūñ-kar janm raushnī kī lagan
ye karishma nahīñ hai kisī sham.a kā dil nahīñ māntā

jalā hai shahr to kyā kuchh na kuchh to hai mahfūz
kahīñ ġhubār kahīñ raushnī salāmat hai