Tags-Raushni

ye raushnī kā aadī rahā hai tamām umr
tārīkiyoñ ne shahr kā naqsha badal diyā

dā.ere añdheroñ ke raushnī ke poroñ ne
coat ke button khole tie kī girah kholī

barā.e naam sahī din ke haath piile haiñ
kahīñ kahīñ pe abhī raushnī ke Tiile haiñ

agar ujāloñ kī hai tamannā na bujhne paa.e charāġh dil kā
ki dil meñ jab raushnī na hogī to har taraf tīrgī milegī

qafas kī tārīk ḳhalvatoñ par haiñ mo'tariz kyuuñ ye ahl-e-duniyā
chaman meñ bhī āshiyāñ jaleñge to phir kahīñ raushnī milegī

rahtī hai shams-o-qamar ko tire saa.e kī talāsh
raushnī DhūñDhtī phirtī hai añdherā terā

ye merā naam 'munavār' zarūr hai lekin
kabhī na paa.ī qarīb apne raushnī maiñ ne

chhāñv meñ zulf ke dhanak ke rañg
saaya yuuñ raushnī se miltā hai

nazar vo log ujāle meñ ḳhud na aa.e kabhī
bulā rahe haiñ jo duniyā ko raushnī kī taraf

har taraf āvāz ke TuuTe hue girdāb haiñ
raushnī kam hai magar chaltā hai dariyā aur bhī

raushnī kar de tamāshā-gāh se dahshat miTe
kohr itnā hai ki pas-e-manzar ayaañ hotā nahīñ

ye mere saath kaisī raushnī hai
ki mujh se rāsta dekhā na jaa.e

qubūl añdherā ḳhushī se koī nahīñ kartā
kise nahīñ hai bhalā raushnī se dilchaspī

kise ḳhabar thī ki jal jā.egā chaman 'shārib'
charāġh ham ne jalā.e the raushnī ke liye

ye ahd-e-nau kā añdherā are ma.āz-allāh
taras rahe haiñ charāġh apnī raushnī ke liye

soz-e-dil se raushnī hone lagī dil meñ 'nazīr'
ishq kī duniyā bhī duniyā husn kī hone lagī

aas hī se dil meñ paidā zindagī hone lagī
sham.a jalne bhī na paa.ī raushnī hone lagī

diyā ḳhāmosh hai lekin kisī kā dil to jaltā hai
chale aao jahāñ tak raushnī ma.alūm hotī hai

jalne se āshiyāñ ke charāġhāñ sā ho gayā
mahrūm ho chuke the na.ī raushnī se ham

raushnī kuchh yuuñ ghuTTī tanhā.ī kuchh aisī baḌhī
apne saa.e ko bhī tārīkī meñ ronā paḌ gayā