Tags-Raushni

dil meñ terī yaad se hai raushnī
aañkh raushan hai tirī tasvīr se

yuuñ ehtimām-e-radd-e-sahar kar diyā gayā
har raushnī ko shahr-badar kar diyā gayā

aks ghaTte baḌhte haiñ shīshagarī hai ek sī
soch ke adse judā haiñ raushnī hai ek sī

ik diyā dil kī raushnī kā safīr
ho mayassar to raat bhī din hai

un tumhārī yādoñ kī raushnī ġhanīmat hai
ab diye jalāne kā vaqt hī nahīñ miltā

thī sadaf meñ raushnī kī buuñd tharrā.ī huī
jism ke andar kahīñ dhaḌkā lagā thā qahr kā

raushnī zaḳhm chhupā.e bhī to kaise āḳhir
maiñ ne sūraj ko shikasta kiyā qindīl ke saath

maiñ ghane añdheroñ kā saaya saath rakhtā huuñ
mere saath kar jaa.e aur raushnī sāzish

tirī sadā hai ki zulmat meñ raushnī kī lakīr
tirā badan hai ki naġhmoñ kā dil dhaḌaktā hai

andhere kāġhaz kī vus.atoñ meñ kahīñ kahīñ raushnī ke dhabbe
ye sa.ī-e-tajsīm-e-nā-bayānī ye ishtibāh-e-bayān sā kuchh

abhī ye raushnī chubhtī huī hai āñkhoñ meñ
abhī ham uTh ke chale aa.e haiñ añdhere se

gañvā.e baiThe haiñ āñkhoñ kī raushnī 'shāhid'
jahāñ-panāh kā insāf dekhne vaale

jab uTh ke chal diye tum tīrgī umaD aa.ī
jo tum na ho to charāġhoñ kī raushnī kyā hai

mirī raushnī tire ḳhadd-o-ḳhāl se muḳhtalif to nahīñ magar
tū qarīb aa tujhe dekh luuñ tū vahī hai yā koī aur hai

ye raushnī tire kamre meñ ḳhud nahīñ aa.ī
sham.a kā jism pighalne ke baad aa.ī hai

raushnī kā koī parcham jo uThā kar nikle
is tarah daar ko zinda nahīñ rahne dete

khiḌkī se raushnī kī vazāhat pe ye khulā
dīvār kā javāz to ghar ke sabab se thā

ham ne toḌā hai zulmatoñ kā fusūñ
raushnī ke bhī tiir khaa.e haiñ

jahāñ rahegā vahīñ raushnī luTā.egā
kisī charāġh kā apnā makāñ nahīñ hotā

nuur kī mahfiloñ meñ rahte haiñ
jo taraste haiñ raushnī ke liye