Tags-Raushni

ho gayā maġhrūr apnī lau pe ghar kā har charāġh
raushnī ke phail jaane se añdherā ho gayā

tīrgī hai ki bhaTaktī hai tirī galiyoñ meñ
raushnī raah dikhātī hī chalī jaatī hai

kisī kī yaad ke jugnū safar meñ jhilmilāte haiñ
añdhere rāstoñ par raushnī mahsūs hotī hai

chalo ki jashn-e-bahār dekheñ chalo ki zarf-e-bahār jāñcheñ
chaman chaman raushnī huī hai kalī kalī pe nikhār sā hai

kabhī is raushnī kī qaid se bāhar bhī niklo tum
hujūm-e-husn ne saarā sarāpā gher rakkhā hai

shab-e-ġham ke ghane añdheroñ meñ
kho ga.ī raushnī sitāroñ kī

ik raushnī kā zahr thā jo aañkh bhar gayā
har dā.era vo soch kā maflūj kar gayā

raushnī phūTe qalam ke aañkh se kyuuñ kar 'matīn'
āñsuoñ ke biij dil meñ jab koī botā nahīñ

sulag uThī to añdheroñ kā rakh liyā hai bharam
jo raushnī hoñ to kyuuñ chashm-e-nauha-gar meñ rahūñ

bin māñge mil rahā ho to ḳhvāhish fuzūl hai
sūraj se raushnī kī guzārish fuzūl hai

hai ye faḳhr jis pe tum ko vo svād-e-raushnī hai
kabhī zulmat-e-zamāñ bhī kahīñ taar taar karte

añdheroñ se shikāyat ho to kyā ho
dikhā.ī kuchh na de jab raushnī meñ

der tak raushnī rahī kal raat
maiñ ne oḌhī thī chāñdnī kal raat

tumhāre chehre to kuchh raushnī meñ aa jaao
jo ho sake to zarā der tak jalāo hameñ

raushnī ke liye dil jalānā paḌā
kaisī zulmat baḌhī tere jaane ke ba.ad

sochiye gar use har nafas maut hai kuchh mudāvā bhī ho be-hisī ke liye
sūrajoñ kī virāsat milī thī hameñ dar-ba-dar ho ga.e raushnī ke liye

raushnī darkār hai to ḳhud hī rauzan vā karo
muntazir kab tak rahoge tum havā-e-tez ke

dil unheñ ro.e jo sail-e-tīrgī meñ gum hue
yā unheñ jo aap apnī raushnī meñ jal-bujhe

raat zulfoñ se kare shoḳh añdheroñ kā savāl
raushnī lauh-e-jabīñ se mah-e-tābāñ māñge

mirā dil hai siine meñ raushnī isī raushnī pe madār hai
maiñ musāfir-e-rah-e-ishq huuñ to ye sham.a rāh-guzār hai