Tags-Raushni

isī mohabbat meñ ham pe guzrā ik aisā aalam bhī tīrgī kā
banā liyā āftāb ham ne milā jo zarra bhī raushnī kā

raushnī ne duniyā kā safar kiyā
magar kisī adālat meñ insāf na milā

vo nahīñ hai to zindagī kaisī
is añdhere meñ raushnī kaisī

raushnī to pahuñchī hai sirf chand logoñ tak
ab bhī kitne insāñ haiñ raat ke añdhere meñ

din kī raushnī meñ jo sab se be-takalluf hai
ham se kyuuñ gurezāñ haiñ raat ke añdhere meñ

zaḳhm detī hai tīrgī aur maiñ
raushnī zaḳhm se banātā huuñ

vahī jo raat pe chhāyā huā añdherā thā
sahar huī hai to vo raushnī se haar gayā

mirī tamannā hai ab ke tum phir milo to jī bhar ke muskurā.eñ
ki dekhnā hai ye raushnī kā safar bahut der ba.ad jā kar

fazā-e-lailā-e-shab meñ hai raushnī us kī
'ziyā'-e-naḳhvat-e-shīrīñ kā āftāb hai ishq

raushnī duur bahut duur hai phir bhī ham se
jagmagāte haiñ ufuq-tā-ba-ufuq lākhoñ diye

raushnī rañgoñ meñ simTā huā dhokā hī na ho
maiñ jise jism samajhtā huuñ vo saayā hī na ho

libās-e-sub.h meñ hai koī rahbar-e-sādiq
jagā rahī hai añdhere ko raushnī kī pukār

ai mere ḳhvāb aa mirī āñkhoñ ko rañg de
ai merī raushnī tū mujhe rāstā dikhā

ye ek saaya ġhanīmat hai rok lo varna
ye raushnī ke badan se lipaTne vaalā hai

tum apnī raushnī mahfūz rakhnā
tumhāre vāste maiñ bujh rahā huuñ

raushnī bāñTtā huuñ sarhadoñ ke paar bhī maiñ
ham-vatan is liye ġhaddār samajhte haiñ mujhe

raushnī apnī taraf aatī huī lagtī hai
tum kisī roz mire shahr kā chehra dekho

ham riyā-kār-e-zamāna haiñ magar zinda haiñ
raushnī terī hazīmat nahīñ kī jā.egī

fazā meñ īstāda raushnī kā ek mīnār
usī ke paas andhiyāre kī dīvār

hai usī se ruuh meñ tāzgī yahī qalb-o-jāñ kī hai raushnī
tū ḳhudā-rā tark-e-sitam na kar mirī zindagī kā savāl hai