Tags-Raushni

raushnī kā jashn sā hai har taraf
phir bhī chehre haiñ ka.ī tārīk se

ham bhī kar leñ jo raushnī ghar meñ
phir añdhere kahāñ qayām kareñ

mere andar bhī añdherā hai bahut
raushnī ai raushnī merī taraf

aa.ī kahāñ se dair-o-haram meñ ye raushnī
merī jabīñ kā nuur mire sañg-e-dar meñ hai

tum ne mahloñ kī raushnī ke liye
kitne ma.asūm dil jalā.e haiñ

saf-ba-saf raushnī ke parde meñ
zulmatoñ ke muhīb saa.e haiñ

ham pale charāġhoñ meñ raushnī se rishta thā nuur ham meñ rahtā thā
chāñd le ke vo nikle jin ko ham ne dekhā thā zulmatoñ kī bāhoñ meñ

mire bedrōm meñ zero ke balb kii...
lahū-rañg raushnī sahmī huī hai

raushnī ke liye dil jalānā paḌā
aisī zulmat baḌhī tere jaane ke ba.ad

raushnī jis kā dil dhaḌaktā thā
duur sahrā ke sārbānoñ meñ

muskurāhaT charāġh aisī thī
raushnī khil uThī makānoñ meñ

kunj-e-dil meñ hai jo malāl uchhāl
raushnī ke kañval uchhāl uchhāl

vo raushnī dimāġh ko denā ḳhayāl kī
hājat rahe mujhe na tumhāre visāl

ab ek ek harf se chhantī hai raushnī
tum se mile na the to ye husn-e-ġhazal na thā

dard-e-dil se ishq ke be-pardagī hotī nahīñ
ik chamak uThtī hai lekin raushnī hotī nahīñ

raushnī ko tīrgī kā qahr ban kar le gayā
aañkh meñ mahfūz the jitne bhī manzar le gayā

har ek chehre se aisā dhuāñ nahīñ uThtā
ye ḳhaas raushnī hotī hai ḳhaas āñkhoñ meñ

tab shola-e-vafā kī tire raushnī huī
jab ḳhaak ho chuke tirī furqat meñ jal ke ham

ek had pe qaa.em hai ghaTtī hai na baḌhtī hai
tīrgī zamāne kī aur raushnī apnī

is se pahle aisī shiddat to añdhere meñ na thī
raushnī kā harf hoñToñ se judā hotā na thā