Tags-Relationship

maiñ tujh se apnā ta.alluq chhupā nahīñ saktā
jabīñ se kaise miTā duuñ tire nishān ko maiñ

kiyā hai ibrat-misāl kaisā ḳhayāl-e-ibrat-nazar ne ham ko
kareñ ta.alluq kisī se kyā ham jo shakl dekhī guzishtanī hai

kabhī to ham haiñ yahāñ vahāñ ke kabhī tasavvur idhar udhar kā
sukūn-o-rāhat se kyā ta.alluq ki bad-gumānī hai aur ham haiñ

vo ba.ad tark-e-ta.alluq kare hai yaad mujhe
use salīqa nahīñ bevafā nayā nayā hai

āġhāz-e-irtibāt-o-ta.alluq ke vāqi.āt
kuchh apne hosh kuchh mire dīvāna-pan se pūchh

raushan hai shab-e-hijr ba-andāz-e-ta.alluq
vo mehr-e-nazar dāġh-e-judā.ī nahīñ detā

us ke vādoñ se itnā to sābit huā us ko thoḌā sā pās-e-ta.alluq to hai
ye alag baat hai vo hai vāda-shikan ye bhī kuchh kam nahīñ us ne vaade kiye

bisāt be-jumbish aur be-his hai
apne mohroñ se lā-ta.alluq hai

be-ta.alluq zindagī hone kā thā imkāñ hī kyā
zindagī zulf-e-ta.alluq thī muqaddar shāna thā

mire hone se ḳhud merā ta.alluq
ba-rañg-e-intihā rakkhā hai us ne

ahl-e-vafā se tark-e-ta.alluq kar lo par ik baat kaheñ
kal tum in ko yaad karoge kal tum inheñ pukāroge

ta.alluq ahl-e-jahāñ se ho gar to rakhiye bīm-o-rajā barābar
sivā ḳhudā ke kisī ke upar kabhī bharosa na kījiyegā

musībat kā ta.alluq ham se kuchh bhī ho to rāhat hai
mire dil ko ḳhudā vo dard de jis kī davā tum ho

jāntā thā ki mire giit bhī kho jā.eñge
terā mujh se jo ta.alluq thā agar ḳhatm huā

daf.atan tark-e-ta.alluq meñ bhī rusvā.ī hai
uljhe dāman ko chhuḌāte nahīñ jhaTkā de kar

ḳhudā aalam hai mazmūn-e-ḳhayālī haiñ tasavvur meñ
na mujh ko kuchh ta.alluq hai na merī us ko parvā hai

jis qadar us se ta.alluq thā chalā jaatā hai
us kā kyā rañj ho jis kī kabhī ḳhvāhish nahīñ kī

abhī tark-e-ta.alluq ke kisī barzaḳh meñ hai vo bhī
abhī mahfūz hai jo maiñ bhī aise faisle meñ huuñ

yādeñ mujhe na jurm-e-ta.alluq kī deñ sazā
merā koī na maiñ hī kisī kā aziiz thā

nahīñ aatā ġhazal meñ naam koī
ta.alluq is qadar bā-ābrū hai