Tags-Sabr

tirā ḳhayāl na aayā so terī furqat meñ
maiñ ro chukā to mire dil ko sabr sā aayā

lekin ab zulm kī mī.ād ke din thoḌe haiñ
ik zarā sabr ki fariyād ke din thoḌe haiñ

hai sitam kā ye karam aah nahīñ karte ham
varna āsān na thā sabr kā ḳhūgar honā

kidhar aa.uuñ jā.ūñ karūñ so kyā mirā jī hī naak meñ aa gayā
na to arz-e-hāl kī taab hai na to sabr-e-ḳhāna-ḳharāb hai

sabr kab tak raah paidā ho ki ai dil jaan jaa.e
ek Takkar maar kar sar phoḌ yā dīvār toḌ

merā qusūr kyā hai saan.e ko chāhiye thā
miqdār-e-husn detā sabr-o-qarār mujh ko

sabr kī takrār thī josh o junūn-e-ishq se
zindagī bhar dil mujhe maiñ dil ko samjhātā rahā

tere aate hī dekh rāhat-e-jāñ
chain hai sabr hai qarār hai aaj

chhūT jaa.e kahīñ na dāman-e-sabr
na karo be-qarār aa jaao

harīf-e-jalva bhī ik roz hūñgā sabr karo
abhī to apnī bahisht-e-tasavvurāt meñ huuñ

jab shikāyat kī kabīda-ḳhātirī hāsil huī
sabr-e-mahrūmī mirā harf-e-duā sābit huā

sabr furqat meñ aa hī jaatā hai
par use der-āshnā kahiye

isī yaqīn par har zulm sahte rahte haiñ
ki shāḳh-e-sabr pe ik din samar bhī aa.egā

haañ pā-e-sabr thak ga.e lekin idhar to dekh
ab sajda-e-hā-e-shukr kiye jā rahā huuñ maiñ

jabr ne jab mujhe rusvā sar-e-bāzār kiyā
sabr ne mere mujhe sāhab-e-dastār kiyā

tamannāoñ ke andhe shahr meñ jab māñgne niklo
to chādar sabr kī sadiyoñ purānī pusht par rakhnā

jiite raheñge vāda-e-sabr-āzmā pe ham
umr apnī misl-e-vaqt-e-gurezāñ hī kyuuñ na ho

zindagī bhar to sadā jabr sahe sabr kiye
maut ke ba.ad mujhe kyā jo mirī qabr jiye

shahroñ ko kyā ḳhabar ki maiñ kaun huuñ kis fazā meñ huuñ
likhnī haiñ ek din mujhe sabr-talab kahāniyāñ

jin kitāboñ meñ vafā kā zikr aa.egā nazar
sabr kiije vo kitābeñ bhī jalā dī jā.eñgī