Tags-Sabr

jaan dete haiñ sabr karte haiñ
vaah kyā hausla hamārā hai

judā.iyoñ ke zaḳhm dard-e-zindagī ne bhar diye
tujhe bhī niiñd aa ga.ī mujhe bhī sabr aa gayā

zaḳhm bhī taaza hai aur dil bhī nahīñ mānūs-e-dard
rafta rafta yūñhī aadat sabr kī ho jā.egī

sabr vahshat-asar na ho jaa.e
kahīñ sahrā bhī ghar na ho jaa.e

hamārā sabr hai be-intihā to hairat kyā
ki 'lais' ham pe sitam bhī to be-hisāb hue

kho baiThe haiñ us ishq ke hāthoñ se 'nasīr' ab
hosh-o-ḳhirad o sabr-o-qarār o dil-o-dīñ ham

sabr-o-sukūñ kahāñ hai tire intizār meñ
dil iḳhtiyār meñ na nazar iḳhtiyār meñ

ka.ī din hue haiñ 'nazīr' ab ki ḳhafā hai ham se vo ġhuncha-lab
use kyā vale hameñ roz-o-shab na to sabr hai na qarār hai

nāla-e-dil se jigar hotā hai chhalnī yārab
sabr kartī huuñ to chal jaatī hai talvār koī

agar na sunte ho baat merī to sabr aa jaa.e jī ko mere
sitam hai un ko ḳhamosh rahnā ġhazab hai sun kar sunā na karnā

sabr-o-qarār TuuT gayā iztirāb se
phir raaz khul gayā mirī āñkhoñ ke aab se

zabt-e-fuġhāñ se aa ga.ī hoñToñ pe jaañ talak
dekhoge mere sabr kī tāqat kahāñ talak

merā sabr aur tire zulm-o-sitam tol sake
kaash ījād meñ aisā bhī tarāzū aa.e

sabr-e-ayyūbī kā jab labrez hotā hai subū
soz-e-ġham se khaultā hai jab ġhulāmoñ kā lahu

ye merā sabr hai ye mujh pise hue kā sabr
ḳhudā-e-qahr tū aa qahr aazmā kar dekh

tum ho mahrūm to tum sabr hī pā jaao 'suhail'
jis ne paa.ī hai mohabbat use tum paane do

har-chand tujhe sabr nahīñ dard va-lekin
itnā bhī na miliyo ki vo badnām bahut ho

be-sabr na ho ai 'valī' is dard suuñ hargiz
jaltā huuñ tire dard meñ darmāñ suuñ kahūñgā

dil chalā sabr chalā jī bhī chalā jaatā hai
Tuk madad kar tū ki lashkar meñ mire chaal hai aaj