Tags-Sabr

aise vaqtoñ meñ kaleja ġham se ho jaatā hai shaq
sabr apne dil kī mayyat par hamārā kaam thā

kahāñ se lā.ūñ sabr-e-hazrat-e-ayyūb ai saaqī
ḳhum aa.egā surāhī aa.egī tab jaam aa.egā

sabr mirā bekār na jaa.e
taḌpe vo taḌpāne vaalā

havā-e-kūfa-e-nā-mehrbāñ ko hairat hai
ki log ḳhema-e-sabr-o-razā meñ zinda haiñ

vo sabr de ki na de jis ne be-qarār kiyā
bas ab tumhīñ pe chalo ham ne inhisār kiyā

sabr se jo thaam kar rakkhī hai apne haath meñ
āñsuoñ ke kitne dariyā vaar duuñ is aah par

agarche roz mirā sabr āzmātā hai
magar ye dariyā mujhe tairnā sikhātā hai

nahīñ Dagne kā qadam rāh-e-vafā se apnā
jo sitam chāho karo sabr mirā haamī hai

itnī tāḳhīr se mat mil ki hameñ sabr aa jaa.e
aur phir ham bhī nazar tujh se churāne lag jaa.eñ

ye qātil vāda-e-sabr-āzmā kyuuñ
ye kāfir fitna-e-tāqat-rubā kyā

zindagī kyā hai sabr karnā hai
ḳhuun kā ghūñT pī ke marnā hai

ne dil rahā bajā hai na sabr o havās o hosh
aayā jo sail-e-ishq sab asbāb le gayā

zulm ke haath pe bai.at kā tasavvur ho to maiñ
sabr aur jur.at-e-inkār se pahchānā jā.ūñ

hamāre sabr kā ik imtihān baaqī hai
isī liye to abhī tak ye jaan baaqī hai

kahte haiñ kis ko sabr-o-tahammul ye ham se pūchh
taklīf jo milī use ārām likh diyā

nazar udaas jigar be-qarār chup ḳhāmosh
tujhe kahā na abhī sabr yaar chup ḳhāmosh

aadmī sabr se nikhartā hai
zindagī hausle se bantī hai

mire harf o saut bhī chhīn le mire sabr-o-zabt ke saath tū
mirā koī maal burā nahīñ merā saarā maal sameT le

majbūrī thī sabr kiyā hai paañv ko toḌ ke baiTh rahe haiñ
nagrī nagrī dekh chuke haiñ dvāre dvāre jhāñk liyā hai

hudūd-e-shauq kī manzil se tā-ba-hadd-e-adab
hazār marhala-e-jāñ gudāz o sabr-talab