Tags-Sabr

mujhe to falsafa-e-sabr bhī gavārā hai
(agarche asl meñ ye qātiloñ kī mantiq hai)

vasl kā saad bhī ho.egā 'hasan' sabr karo
daftar-e-ishq kī dauḌeñ haiñ barāteñ dil meñ

in hādsoñ se kah de zarā sabr to kareñ
ai ziist terī bazm meñ bilkul nayā huuñ maiñ

mire shajar tujhe mausam nayā banāte raheñ
gulāb-e-sabr tirī Tahniyoñ pe aate raheñ

aur bhaḌke hai ishtiyāq kī aag
ab kise sabr-o-tāb baaqī hai

rah-navard-e-bayābān-e-ġham sabr kar sabr kar
kārvāñ phir mileñge baham sabr kar sabr kar

kaun hai vo ḳhush-qismat dekheñ
jis ko sabr kā ajr milā hai

nīm-jāñ chhoḌā tirī talvār ne achchhā kiyā
eḌiyāñ bismil ne ragḌīñ sabr kā jauhar khulā

dil o diin va ḳhirad o sabr kujā kū ārām
ghar luTā ham ne diyā ishq meñ saarā apnā

aisī pyaas aur aisā sabr
dariyā paanī paanī hai

chhalak rahā hai zamāne ke sabr kā pyāla
hamāre ahd ke fir.aun ko azaab to de

kaaT kar pheñk dī sansār kī kūcheñ ham ne
sabr ko phuul kiyā phuul ko talvār kiyā

zard pattoñ ke ThanDe badan apne hāthoñ pe le kar havā ne shajar se kahā
agle mausam meñ tujh par na.e barg-o-bār ā.eñge tab talak sabr kar yā aḳhī

kiyā jab sabr furqat meñ to phir zikr-e-butāñ kaisā
ba-āh-o-zāriyāñ kaisī haiñ ye shor-e-fuġhāñ kaisā

baiThe baiThe tujh ko jis dam yaad kar letā huuñ maiñ
māya-e-sabr-o-sukūñ barbād kar letā huuñ maiñ

merī peshānī pe us bal kī jagah hai hī nahīñ
sabr ke saath jo hamvār paḌā hai mujh meñ

tham ga.e jam ga.e āñkhoñ meñ lahū ke qatre
ḳhuun zāhir hai mire sabr o shakebā.ī kā

vo ye kahte haiñ mirā sabr paḌegā tujh par
ab mujhe ranj nahīñ apnī shakebā.ī kā

kahāñ se sabr laa.eñ ham kahāñ ab aur jaa.eñ ham
bahut hī zaḳhm paa.e haiñ are in husn vāloñ se

shām-e-ġham ke rone vaale sabr kar
sub.h bhī hogī tirī taqdīr se