Tags-Sabr

sabr aa jaa.e is kī kyā ummīd
maiñ vahī, dil vahī hai, tū hai vahī

sabr hijrāñ meñ kare 'kaifī'-e-mahzūñ kab tak
āḳhir ai dost koī hadd-e-shakebā.ī hai

kahāñ barq-e-ishq o kahāñ koh-e-sabr
bagūle ke aage par-e-kāh hai

ishq hai iḳhtiyār kā dushman
sabr o hosh o qarār kā dushman

hāsid tujh par agar hasad kartā hai
kar sabr ki ḳhud vo kār-e-bad kartā hai

yaar ma.amūl pe lauT ā.eñge kuchh sabr karo
us fusūñ-gar kī nigāhoñ kā asar jaane do

jis din siiñ maiñ yaar būjhtā huuñ
kab sabr-o-qarār būjhtā huuñ

do roTiyāñ nahīñ na sahī ek hī sahī
is par hī sabr kar ki zamāna ḳharāb hai

sabāt-o-sabr zarūrī hai aadmī ke liye
shikan jabīñ pe na aa.e ba-vaqt-e-ranj-o-mehan

vaj.h-e-nākāmī na hoñ ai dil tirī be-sabriyāñ
sabr se le kaam ḳhud har kaam hotā jā.egā

kyuuñ hijr ke shikve kartā hai kyuuñ dard ke rone rotā hai
ab ishq kiyā to sabr bhī kar is meñ to yahī kuchh hotā hai

sar bar huī na vāda-e-sabr-āzmā se umr
fursat kahāñ ki terī tamannā kare koī

tadbīr kyā ho sabr-o-shakeb-o-qarār kī
vo tund-ḳhū hai bas kā na dil iḳhtiyār kā

bahut tāḳhīr se paayā hai ḳhud ko
maiñ apne sabr kā phal ho ga.ī huuñ

jab duā.eñ bhī kuchh asar na kareñ
kyā kareñ sabr ham agar na kareñ

na sukūn-e-dil na qarār-e-jāñ na qayām-e-sabr koī zamāñ
ye sarishk-e-ġham kā hai kārvāñ ki yūñhī hamesha ravāñ rahā

nahīñ sabr sāqiyā lā bhī de qadah-e-bahār uThā bhī de
abhī sin hai lā ke pilā bhī de ki hamesha kaun javāñ rahā

haq parastoñ ke liye sabr kā lamha hai 'ziyā'
jhuuT ke neze pe sachchā.ī kā sar aa gayā hai

ujaḌ ga.e ḳhirad-o-sabr-o-hosh-o-tāb-o-tavāñ
usī ke nāz-o-adā kī sipāh ke maare

na tasallī na dilāsā na kahīñ naam ko sabr
haif is dil pe ki yuuñ be-sar-o-sāmāñ ho jaa.e