Tags-Sabr

dil-shikan ahd-shikan sabr-shikan qadr-shikan
pūchh le apne sab alqāb-e-sifātī mujh se

sabr aa jaa.e agar apnā ye haal
jin kī ḳhātir hai vo tanhā dekheñ

ta.ane be-sabr yuuñ ke haa.e tashaffī ke evaz
aur dikhte hue dil ko vo dukhāne aa.e

sabr ko kar canvas jo yaar kī ḳhātir sahā
yaar kī photo banā phir ġhaar ko tasvīr kar

vaadā chuuk phir aayā 'nājī' dars kī ḳhātir phaḌke mat
chhūT gale tere ai zālim sabr kahāñ be-sabroñ ko

sabr ke baaġh ke manDve se jhaḌā huuñ jiyūñ phuul
ab to lāchār gale haar huuñ kin kā un kā

nahīñ sabr hī kī kamī tujh meñ 'fazlī'
mirī jaan kuchh ḳhāmiyāñ aur bhī haiñ

tere kahne se maiñ ab lā.ūñ kahāñ se nāseh
sabr jab is dil-e-muztar ko ḳhudā ne na diyā

aise meñ to ab sabr bhī mushkil huā 'akbar'
sab kahte haiñ maiñ us ko bhulāne meñ lagā huuñ

hazār apnī tabī.at pe jabr kartā thā
maiñ sabr kartā thā be-iḳhtiyār maiñ bhī thā

yuuñ dard kī Tīseñ uThtī haiñ yuuñ sabr kā dāmāñ chhuTtā hai
maazī kā fasāna phir dil se Dar Dar ke bhulānā paḌtā hai

kaun ham se qadam milā ke chalā
ek sabr-e-gurez-pā ke sivā

zaḳhm-e-vajūd kī davā bas vahī āḳhirī sadā
zinda huuñ jis ke shauq meñ sabr-e-kabīr ke sabab

ḳhudā jaane kyā hogā anjām is kā
maiñ be-sabr itnā huuñ vo tund-ḳhū hai

chal mere saath aur qadam tol tol kar
sabr-o-razā kī raah baḌī pechdār hai

ye sabr kī talqīñ aur TuuTe TuuTe jumle bahkī satreñ
jo tum ne chhupānā chāhā thā vo chhup na sakā tahrīr meñ bhī

na pāmāl hone diyā sabr ne
gire āñsuoñ ko uThā le gayā

koī de ke mujh ko shu.ūr-e-hayāt
mirā duur sabr-āzmā le gayā

sabr karne ko jo kahte haiñ nahīñ aate haiñ
kyā mire zaḳhm-e-jigar aap hī bhar ā.eñge

kaheñ haiñ sabr kis ko aah nañg o naam hai kyā shai
ġharaz ro piiT kar un sab ko ham yak baar baiThe haiñ