Tags-Sabr

ye kachche seb chabāne meñ itne sahal nahīñ
hamārā sabr na karnā bhī ek himmat hai

ik zarā sabr ki parvāz kā ḳhāliq yak-dam
vaqt aane pe par-o-bāl badal detā hai

usī pe sabr hai mujh ko har ek daur yahāñ
bahār aane se pahle ḳhizāñ se guzrā hai

sabr kī taab nahīñ jis ko vo dil hai merā
rahm kā naam nahīñ jis meñ vo terā dil hai

na tujhe rahm ne use Tuk sabr
dil pe mere ajab musībat hai

savāl karne ke hausle se javāb dene ke faisle tak
jo vaqfa-e-sabr aa gayā thā usī kī lazzat meñ aa basā huuñ

tā.at-e-amn-o-sukūñ kā dil ko lekin ho jo shauq
sabr par tab-e-havas-añgez ko raazī karo

be-sabrī-e-hijrāñ meñ bhī ik baat hai 'ḳhāvar'
har-chand ki haiñ sabr-o-qarār apnī jagah ḳhuub

mohabbat meñ haiñ sabr-o-shukr ke har-chand ham qaa.il
magar kuchh kuchh kabhī lab par shikāyat aa hī jaatī hai

us ko muddat huī sabr karte hue aaj kū-e-vafā se guzarte hue
pūchh kar us gadā kā Thikānā sajan apne 'inshā' ko bhī dekh aanā sajan

mustaqil sabr meñ hai koh-e-girāñ
naqsh-e-ibrat sadā nahīñ kartā

sayyād ko kabhī na musībat ne dī najāt
bulbul ke sabr meñ ye giraftār hī rahā

sabr aa jaa.e is kī kyā ummīd
maiñ vahī, dil vahī hai tū hai vahī

kartā hai jald-bāziyāñ insāñ
sabr ko rā.egāñ samajhtā hai

bar-sar-e-paikār donoñ haiñ natīja kuchh nahīñ
josh hai dariyāoñ meñ aur sabr dīvāroñ meñ hai

aql o hosh o sabr sab jaate rahe
haañ magar ik-ādh mui sī jaan hai

sabr kartā huuñ to ehsās ziyāñ boltā hai
chup jo rahtā huuñ to phir saarā jahāñ boltā hai

madad ai iztirāb-e-shauq tū jān-e-tamannā hai
nikal ai sabr terā kaam kyā hai be-qarāroñ meñ

dil-e-betāb 'fuġhāñ' ummat-e-ayyūb nahīñ
na use sabr hai hargiz na shakebā.ī hai

ġhamgīñ haiñ jis ke ġham se vāqif nahīñ vo ham se
yārab phir is alam se ho sabr-o-tāb kyuuñ kar