Tags-Sabr

jabr sahtā huuñ magar kab tak sahūñ insān huuñ
sabr kartā huuñ magar dil sabr ke qābil nahīñ

sabr-o-zabt kī jānāñ dāstāñ to maiñ bhī huuñ dāstāñ to tum bhī ho
apnī apnī azmat kā āsmāñ to maiñ bhī huuñ āsmāñ to tum bhī ho

sab rishte ab to TuuT chuke sabr-o-zabt ke
añgḌā.iyoñ ko rok uḌā jā rahā huuñ maiñ

jī to be-qarārī se jāñ-ba-lab hai ai nāseh
ko tahammul o tāqat sabr aur shakebā.ī

chashm-e-shafaq thī ḳhūñ-nashīñ chehra-e-shab thā teġh-e-tez
ḳhvāb paḌe the taar taar sabr-o-qarār kis ko thā

sun ke adā-e-ġham kī tere sabr-o-shakeb haiñ bhāgne par
paañv Thaharne mushkil haiñ jab dhaak parā.ī baiTh ga.ī

sabr kā dāmān-e-daulat hai amīroñ kā amiir
jabr kī daryūzgī ko saiñkaḌoñ dar chāhiye

kisī ne vāda-e-sabr-āzmā kiyā to hai
ḳhudā kare ki mujhe tāb-e-intizār rahe

masīhā.ī kī sub.hoñ sabr kī rātoñ ke āñgan meñ
lahū bahtā rahā bahtā rahā āhista āhista

diloñ meñ ab ke baras itne vahm kyuuñ jaage
bilād-e-sabr meñ ab iztirāb kyuuñ aayā

kaun jaa.e hadaf-e-tīr-e-nazar hone ko
sabr se kaam agar ai dil-e-nākām chale

vo āzmātā hai kāñToñ se sabr insāñ kā
phir us ke ba.ad mahakte gulāb detā hai

sabr se kaam le ai dil is añdhere se na Dar
zulmat-e-shab hai sapedī-e-sahar hone tak

be-nishāñ tujh ko samajh kar sabr aa jaatā mujhe
par ye mushkil hai ki maiñ vāqif huuñ tere naam se

na thā nasīb meñ dil kī murād bar aanā
to kaash sabr kī aadat atā huī hotī

hamāre sabr ne us ko thakā diyā itnā
ye mo.ajaza hai ki maqtal meñ zulm hāñptā hai

jaur kā shikva na karūñ zulm hai
raaz mirā sabr ne ifshā kiyā

ai mire armān-e-dil bas ik zarā kuchh aur sabr
raat abhī kaTne ko hai milne ko bhī hai yaar abhī

bahut aatā hai yaad ai sabr-e-miskīñ
ḳhudā ḳhush rakkhe tujh ko tū jahāñ hai

ham ne maanā aap meñ hogī sabr kī tāqat ham se ziyāda
dekhiye lekin utrī huī hai aap kī sūrat ham se ziyāda