Tags-Sabr

ghar us ne banāyā thā ik sabr o razā kar ke
miTTī meñ milā Daalā ehsān jatā kar ke

kyuuñ hijr ke shikve kartā hai kyuuñ dard ke rone rotā hai
ab ishq kiyā to sabr bhī kar is meñ to yahī kuchh hotā hai

har-qadam marhala-e-sabr-o-razā ho jaise
zindagī mārka-e-karb-o-balā ho jaise

ye kyā qayāmat hai yā ilāhī ki un kī aamad kā haal sun kar
shakeb-o-sabr-o-qarār hosh-o-havās pahle hī jā chuke haiñ

zarūrat ko jakaḌ kar sabr kī zanjīr meñ rakhnā
nahīñ to bhuuk ḳhuddārī ko ik din bech khā.egī

sabr mushkil thā mohabbat kā asar hone tak
jaan Thahrī na dil-e-dost meñ ghar hone tak

sabr kareñge jab tak ishq nahīñ hotā
dekheñ us ko kab tak ishq nahīñ hotā

'sābir'-e-ḳhasta ko har haal meñ yā rab rakh shaad
kahīñ aisā na ho ho sabr fanā mere baad

vo aayā bazm meñ dekho na kahiyo phir ki ġhāfil the
shakeb-o-sabr-e-ahl-e-anjuman kī āzmā.ish hai

sabr vāloñ kā bhī din aa.egā
ek din roz-e-jazā bhī hogā

dil se jaate haiñ mire sabr-o-qarār
ghar ye vīrān huā jaatā hai

na ham duā se ab na vafā se talab kareñ
ishq-e-butāñ meñ sabr ḳhudā se talab kareñ

ye kah kar sabr karte haiñ sitam par
hamārā bhī kabhī hogā zamāna

sonā ruupā sīm-o-javāhir sabr o dil o diiñ hosh-o-qarār
aañkh uThā kar dekhte hī ek aan meñ sab rakhvā legī

kareñ lab ko na ālūda kabhī harf-e-shikāyat se
shi.ār apnā banāyā sheva-e-sabr-o-razā ham ne

dil hī to hai na aa.e kyuuñ dam hī to hai na jaa.e kyuuñ
ham ko ḳhudā jo sabr de tujh sā hasīñ banā.e kyuuñ

jis qadar mahmez kartā huuñ maiñ 'sājid' vaqt ko
us qadar be-sabr rahne kī use aadat nahīñ

ġham pe ġham mujhe de kar ġham se kar diyā mahrūm
kyā milā zamāne ko sabr-āzmā ho kar

zāt-e-nisvāñ ko hī bas sabr kā dam bharnā hai
be-sabab zulm vo Dhaa.e to koī baat nahīñ

sabr ḳhud uktā gayā achchhā huā
kuchh to bojh ehsās kā halkā huā