Tags-Sabr

diloñ ko sabr-o-sukūñ to na mil sakā lekin
koī to kaam tirī chashm-e-bā-hayā se huā

māñgne par kyā na degā tāqat-e-sabr-o-sukūn
jis ne be māñge atā kar dī pareshānī mujhe

kabhī sukūñ kabhī sabr-o-qarār TūTegā
agar ye dil hai to phir baar baar TūTegā

jī bhar ke dil kī maut pe rone diyā use
pursā diyā na sabr kī talqīn ham ne kī

ai sabr dam-ba-dam ab dard-o-alam fuzūñ hai
jitnā hai dil kā yaarā ma.alūm ho rahegā

shab-e-furqat kisī ne bhī na mujh nākām ko pūchhā
na tum aa.e na maut aa.ī na sabr aayā na ḳhvāb aayā

jo us be-rahm par apnā dil-e-ḳhāna-ḳharāb aayā
ga.e sabr-o-tahammul hosh-o-tāqat iztirāb aayā

vo aanā kisī kā dil meñ 'rāġhib'
aur sabr-o-qarār luuT jaanā

sabr kī ik qabā jo baaqī thī
us ko bhī taar taar kar baiThe

dam-e-āḳhir hai baiTh jā mat jā
sabr kar Tak ki ham bhī chalte haiñ

mohabbat sabr donoñ kar rahā huuñ
zarā socho ye kaise ho rahā hai

yuuñ savāl-e-vasl par Taalā kiyā barsoñ koī
sabr kar muztar na ho terā kahā ho jā.egā

ek se haiñ ādāb zabāñ-bandī ke har ik mahfil meñ
sabr kā jaam uThā ai dil aur ḳhāmoshī se pī āvāz

le gayā chhīn ke kaun aaj tirā sabr o qarār
be-qarārī tujhe ai dil kabhī aisī to na thī

sabr karo muhāsibo vaqt tumheñ batā.egā
dahr ko maiñ ne kyā diyā dahr se kyā milā mujhe

itnā bhī diyā sabr na us nafs-danī ko
kutte kī tarah baiThtā qismat kā diyā chaaT

yazīd zulm sitam taḳht taaj bai.at fauj
husain sabr razā karbalā namāz aur ishq

ishq meñ hosh o sabr sunte the
rakh ga.e haath so to kānoñ par

vo zakāt-e-daulat-e-sabr bhī mire chand ashkoñ ke naam se
vo nazar-guzar kī sharāb thī jo chhalak ga.ī mire jaam se

is but se dil lagā ke bahut sochte rahe
sabr-o-sukūñ luTā ke bahut sochte rahe