Tags-Sabr

vo thā jahāz kā panchhī na maiñ jahāz koī
na kaam sabr hī aayā na intizār aayā

ham ko shu.ūr-e-sabr-o-razā se navāz kar
ġham-āshnā-e-lazzat-e-dard-e-jigar kiyā

sabr kī chādar ko oḌhe ḳhvāb-gāhoñ meñ raho
sach kī duniyā chhoḌ kar va.adoñ kī bastī meñ chalo

mujh pe āshiq nahīñ hai kuchh zālim
sabr āḳhir kare vafā kab tak

dil uThāveñge tujh se tā-maqdūr
sabr karne pe go na qādir haiñ

gavāh haiñ rah-e-shauq-o-talab ke sannāTe
kiyā hai ham ne ye sabr-āzmā safar tanhā

ai ahl-e-dil ḳhamosh ki ye jā-e-sabr hai
dukh to yūñhī raheñge masīhā na aa.egā

ye ghaḌī sabr-āzmā hogī
zinda rahne kā hausla rakhnā

jo us ne kiyā use sila de
maulā mujhe sabr kī jazā de

laboñ ne sabr tahammul ko khā liyā 'mashkūr'
sitam tumhārā mirī ḳhāmoshī ko le Duubā

ghabrā na is qadar dil-e-betāb sabr kar
aatā hai koī roz meñ ab sub.h-o-shām ḳhat

ye jo raushnī hai kalām meñ ki baras rahī hai tamām meñ
mujhe sabr ne ye samar diyā mujhe zabt ne ye hunar diyā

us chashm-e-ashk-e-bār kī zid rā.egāñ to ho
merī fasīl-e-sabr kā koī nishāñ to ho

dard tū mere paas se marte talak na jā.iyo
tāqat-e-sabr ho na ho tāb-o-qarār ho na ho

bas ik pukār pe darvāza khol dete haiñ
zarā sā sabr bhī in āñsuoñ se hotā nahīñ

kahāñ kā sabr ki dam par hai ban ga.ī zālim
ba tañg aa.e to hāl-e-dil āshkār kiyā

taḌap phir ai dil-e-nādāñ ki ġhair kahte haiñ
aḳhīr kuchh na banī sabr iḳhtiyār kiyā

ham sabr-o-razā ke bande haiñ jo tum ne kiyā sab jhel liyā
ab dil meñ bhī afsos nahīñ ab lab par bhī haihāt nahīñ

kyā chāra kareñ kyā sabr kareñ jab chain hameñ din-rāt nahīñ
ye apne bas kā rog nahīñ ye apne bas kī baat nahīñ

sabr kī mujh ko judā.ī meñ hai talqīn fuzūl
ye to jab ho ki rahe sham.a se parvāna judā