Tags-Sad

ye udāsī kā sabab pūchhne vaale 'ajmal'
kyā kareñge jo udāsī kā sabab batlāyā

ek ham hī ne sameTī hai udāsī terī
shām-e-ġham ham ne uThā.e haiñ tire naaz bahut

log hañste haiñ udāsī meñ taḌaptā huuñ jab
ek to dard hai uupar se satāne vaale

surḳh phūloñ kā nahīñ zard udāsī kā sahī
rañg kuchh to mirī tasvīr meñ bhartā jaa.e

udāsī ab kisī kā rañg jamne hī nahīñ detī
kahāñ tak phuul barsā.e koī gor-e-ġharībāñ par

in dinoñ to ḳhushiyoñ ke rañg bhī haiñ afsurda
un dinoñ udāsī ke rañg bhī sunahre the

jab āñkhoñ meñ dil kī udāsī rañg bhare
aap hī apnī hañsī uḌānā achchhā hai

phir vahī dil meñ udāsī ke umaDte bādal
phir vahī silsila-e-ḳhāk-o-ḳhazaf khīñchtā hai

phir uThā yaad ke āñgan se udāsī kā dhuāñ
kis ne tāqoñ meñ jalā kar mirī shāmeñ rakh diiñ

umr kī udāsī ke dūsre kināre par
ek ajnabī chehra ho rahā hai zam mujh meñ

udāsī khīñch laa.ī hai yahāñ tak
maiñ aañsū thā samundar meñ paḌā huuñ

ye udāsī bhī be-sabab to nahīñ
dil kisī justujū meñ mar rahā hai

yahāñ bhī dil pe udāsī kā chhā rahā hai dhuāñ
ye rañg o nuur kī bastī hai kyā kahā jaa.e

fazā meñ kaisī udāsī hai kyā kahā jaa.e
ajiib shaam ye guzrī hai kyā kahā jaa.e

galiyoñ kī udāsī pūchhtī hai ghar kā sannāTā kahtā hai
is shahr kā har rahne vaalā kyuuñ dūsre shahr meñ rahtā hai

guzārā din jo udāsī meñ shaam kahne lagī
bahut akelī huuñ maiñ koī mere saath jale

haiñ labrez aahoñ se ThanDī havā.eñ
udāsī meñ Duubī huī haiñ ghaTā.eñ

attār ke maskan meñ ye kaisī udāsī hai
sone kī muqābil meñ har samt hī miTTī hai

hijr ke mausam meñ yaad aatī hai ḳhushbū dostoñ kī
ham udāsī meñ bhī yāroñ kī rifāqat chāhte haiñ

udāsī thī ki thā ik jalva-e-sad-rañg-o-bū shāyad
dil-e-be-rañg bhī rañgoñ kā shīrāza nazar aayā