Tags-Sad

udāsī ko udāsī kyuuñ nahīñ taslīm karte
mirī palkoñ pe aañsū haiñ sitāre to nahīñ haiñ

udāsī ke āñgan meñ terī talab kī
ajab ḳhushnumā ik kalī khil rahī hai

is udāsī kā dhuñdlakā ḳhatm ho shāyad kabhī
shaam se pahle hī unvān-e-sahar ho jā.iye

dhaḌkan udaas dil pe udāsī kī dhuup hai
lipTā hai mujh se terā ye ġham aur kuchh nahīñ

isī liye to udāsī se guftugū nahīñ kī
kahīñ vo baat na bātoñ ke darmiyāñ ho jaa.e

ḳhudā ko maan ki tujh lab ke chūmne ke sivā
koī ilaaj nahīñ aaj kī udāsī kā

dar-o-dīvār par chhā.ī hai udāsī ġham kī
mahv-e-hairat hai ḳhushī dīda-e-hairāñ kī tarah

chahakte bolte shahroñ ko kyā huā 'nāsir'
ki din ko bhī mire ghar meñ vahī udāsī hai

jahāñ meñ yuuñ to kise chain hai magar pyāre
ye tere phuul se chehre pe kyuuñ udāsī hai

mire dil ke akele ghar meñ 'rāhat'
udāsī jaane kab se rah rahī hai

shafīq sūraj ḳhamosh paanī magar abhī bhī kamī hai kuchh kuchh
'charāġh'-sāhab ke sher paḌh kar kareñ mukammal hamīñ udāsī

bichhaḌne vaale bichhaḌte Time na kah sake kuchh na sun sake kuchh
bas ek photo meñ qaid kar lī ga.ī balā kī hasīñ udāsī

badhā.ī chahkīñ duā.eñ gūñjī tamām chehre ḳhushī se jhūme
qubūl hai tiin baar bolī jab ek parda-nashīñ udāsī

mire shabistāñ ke paas koī burī tarah kal sisak rahā thā
maiñ us ke siine se lag ke bolā nahīñ udāsī nahīñ udāsī

samay kī āñkhoñ se dekhiye to har ik khañDar meñ chhupe mileñge
kahīñ pe bachpan kahīñ javānī kahīñ buḌhāpā kahīñ udāsī

jahāñ jahāñ par qadam rakhoge tumheñ milegī vahīñ udāsī
ye raaz kuchh is tarah samajh lo makāñ mirā hai makīñ udāsī

jidhar añdherā hai tanhā.ī hai udāsī hai
safar kī ham ne vahī samt kyuuñ muqarrar kī

galiyoñ kī udāsī pūchhtī hai ghar kā sannāTā kahtā hai
is shahr kā har rahne vaalā kyuuñ dūsre shahr meñ rahtā hai

tamannāoñ ke siine par rakhe sar
udāsī baal khole so rahī hai

mānūs ho chalī hai udāsī se zindagī
paañv ke ābloñ kā nazārā to hai abhī