Tags-Safar

ye rivāyat hai kitāboñ meñ utāre jaa.eñ
vo jo ḳhushbū ke safar meñ kahīñ maare jaa.eñ

mujh se mere sivā na kuchh bhī maañg
maiñ safar bhī huuñ armuġhāñ bhī huuñ

tez-raftār sahī laakh mirā azm-e-safar
vaqt āvāz jo degā to Thahar jā.ūñgā

aa.e Thahre aur ravāna ho ga.e
zindagī kyā hai, safar kī baat hai

safar meñ koī rukāvaT nahīñ gadā ke liye
khulā huā hai har ik rāsta havā ke liye

uTheñge maut se pahle usī safar ke liye
jise hayāt ke sadmoñ ne multavī na kiyā

kise manzil-e-dilkash-e-dahr meñ
nahīñ miil ḳhātir safar kī taraf

vo niiñd ke safar meñ to maḳhmūr thā bahut
āñkheñ khulīñ to ḳhvāb ke manzar se Dar gayā

zindagī kyā hai ik safar ke sivā
ek dushvār rahguzar ke sivā

kitnā bekār tamannā kā safar hotā hai
kal kī ummīd pe har aaj basar hotā hai

tulū-e-sub.h se pahle hī bujh na jaa.eñ kahīñ
ye dasht-e-shab meñ sitāroñ kī ham-safar āñkheñ

zamīñ kī god meñ itnā sukūn thā 'anjum'
ki jo gayā vo safar kī thakān bhuul gayā

jab shauq kī āñkhoñ meñ raqsāñ kaunain ke jalve hote haiñ
manzil vahīñ ḳhud khiñch aatī hai takmīl-e-safar ho jaatī hai

thā ham-safar bhī safar bhī jo merī manzil bhī
usī ko raah kī dīvār kis tarah kartā

silsila mere safar kā kabhī TuuTā hī nahīñ
maiñ kisī moḌ pe dam lene ko Thahrā hī nahīñ

ab vo safar kī taab nahīñ baaqī varna
ham ko bulāve dasht se jab tab aate haiñ

safar kā marhala to ba.ad meñ mahl-e-nazar hogā
abhī to mudda.ā hai rāsta pur-ḳhār karne kā

rāteñ apnī raushan kar lo ashkoñ se 'shāyān' abhī
vaqt se pahle apne safar kī tayyārī dānā.ī hai

gul bantī hai shāyad ḳhāk-e-vatan shāyad ki safar kartī hai ḳhizāñ
ḳhushbu-e-bahārāñ miltī hai kuchh din se havā-e-zindāñ meñ

mujhe ḳhabar thī mirā intizār ghar meñ rahā
ye hādsa thā ki maiñ umr bhar safar meñ rahā