Tags-Sahil

pā liyā jis ne tah-e-āb bhī apnā sāhil
mutma.in thā mirā tūfān Dubo kar mujh ko

tūfān-e-alam kyuuñ mujhe sāhil pe utārā
maiñ shor-e-talātum se hirāsāñ to nahīñ thā

maiñ ḳhud hī tūfāñ huuñ apnā sāhil nikāl lūñgā yahīñ kahīñ se
jahāñ safīne bhī Duub jaa.eñ maiñ un kināroñ kā kyā karūñgā

dekhnā chāheñ to sāhil par liye manzar bahut
Dūbnā chāheñ to koī mauj-e-dariyā kam nahīñ

pyaas hoñToñ par liye baiThā huuñ sāhil par magar
zid pe aa jā.ūñ to kuuze meñ samundar dekhnā

shorish-e-paiham bhī hai afsurdagi-e-dil bhī hai
zindagī bahtā huā dhārā bhī hai sāhil bhī hai

hai idhar tūfān dāman-gīr 'rāhī' kyā karūñ
muntazir merā udhar koī lab-e-sāhil bhī hai

surḳh parinda Duub rahā hai kaalī jhiil ke paanī meñ
sach kahnā ai sāhil vaalo tum ko kaisā lagtā hai

sāhil pe unhīñ kā haq hai 'shā.ir'
tūfāñ kā jo ruḳh badal rahe haiñ

himmat hai to phir saarā samundar hai tumhārā
sāhil pe pahuñch jaao to kashtī ko jalā do

tishnagī had se guzar jā.egī sāhil ke qarīb
fā.eda kyā hai samundar kā taqāzā kar ke

ḳhush-fahmiyoñ kī had hai ki paanī meñ ret par
jo bhī jagah mile use sāhil samajhte ho

jab azm ke sho.aloñ ko himmat ne havā dī hai
tūfāñ ne hī sāhil kī tasvīr dikhā dī hai

ek āvāz ne toḌī hai ḳhamoshī merī
DhūñDhtā huuñ to pas-e-sāhil-e-shab kuchh bhī nahīñ

ek panchhī der tak sāhil pe mañDlātā rahā
muztarib thā pyaas se lekin vo utrā kyuuñ nahīñ

vo jā rahā thā samundar ko jhelne ke liye
araq araq sar-e-sāhil tamām manzar thā

kanār-e-mauj meñ marnā to ham ko aatā hai
nishān-e-sāhil-e-ulfat milā milā na milā

hameñ rah rah ke tūfāñ kī rifāqat yaad aatī hai
haiñ ab āsūda-e-sāhil khaḌe sāhil pe rote haiñ

ik gharauñdā reg-e-sāhil se banā
barf ke patthar se ik dilbar tarāsh