Tags-Sahil

ek sāhil hī thā girdāb-shanāsā pahle
ab to har dil ke safīne meñ bhañvar lagtā hai

sāhil ke tamāshā.ī har Dūbne vaale par
afsos to karte haiñ imdād nahīñ karte

kaash mil jaatā kahīñ sāhil koī
ham bhī kashtī se utar ke dekhte

daur-e-tūfāñ meñ bhī jī lete haiñ jiine vaale
duur sāhil se kisī mauj-e-gurezāñ kī tarah

bahr-e-hastī meñ mazā dene lage tūfāñ bhī ab
ai nadīm āsūda-e-sāhil huā jaatā huuñ maiñ

umr bhar maiñ ne bhī sāhil ke qasīde likkhe
mere bachchoñ ne bhī ik ret kā ghar bāñdh liyā

salīb-e-jāñ se visāl āsmāñ ke sāhil tak
har ek lazzat-e-āzār meñ hai saath mire

yādeñ hotī haiñ samundar ke
sāhil par ghūmte ek bachche kī tarah

āñkhoñ par apnī rakh kar sāhil kī āstīñ ko
ham dil ke Dūbne par aañsū bahā rahe haiñ

ḳhudā ko nā-ḳhudā kahne lagā huuñ
safīna tālib-e-sāhil nahīñ hai

laakh maujoñ kī balā-ḳhezī ne kī khilvāḌ bhī
us ne kashtī ko magar sāhil pe pahuñchāyā bhī hai

koī maujoñ se yūñhī aTkheliyāñ karte rahe
aur sāhil par kisī ko tañg honā chāhiye

sāhil pe gavāra hameñ marnā bhī nahīñ hai
TuuTī huī kashtī se utarnā bhī nahīñ hai

gahre samundaroñ meñ sitāra na thā koī
sāhil kī shaam mil na sakī bādbān se

paanī ke madd-o-jazr ko samjhā hai zindagī
maujeñ bhī haiñ fareb jo sāhil fareb hai

ik din thā ki sāhil par baiThe tūfāñ pe tabassum karte the
ab māyūsī ke aalam meñ sāhil kā tamāshā karte haiñ

mallāhoñ ko ilzām na do tum sāhil vaale kyā jaano
ye tūfāñ kaun uThātā hai ye kashtī kaun Dubotā hai

dariyā kī hadoñ meñ jo utar jāoge ai shams'
ā.eñge nazar sāhil-o-dariyā mut.harrik

juuñ mauj haath māriye kyā bahr-e-ishq meñ
sāhil 'nasīr' duur hai aur dam nahīñ rahā

mauj-o-sāhil mah-o-anjum gul-o-lāla dekhe
jab kahīñ tujh ko na paayā to sar-e-dār aa.e