Tags-Sahil

samajh na mauj mire muñh meñ haiñ hazāroñ zabāñ
maiñ bahr huuñ lab-e-sāhil se baat kartā huuñ

chale mallāh kashtī giit ummīdeñ
ki jaise sab ko sāhil ne bulāyā thā

razm-kunāñ rah-e-tūfāñ se
mil hī jā.egā sāhil

ġharq ho jaate mohabbat meñ mohabbat-āshnā
sāhil-o-dariyā se bhī kar ke kinārā dekhte

maiñ to sāhil huuñ mauj dariyā kī
mujh ko ḳhud hī gale lagātī hai

ai mauj-e-balā un ko bhī zarā do chaar thapeḌe halke se
kuchh log abhī tak sāhil se tūfāñ kā nazāra karte haiñ

sāhil pe ruk ke sū-e-samundar na dekhiye
bāhar se apne aap kā manzar na dekhiye

siine meñ maujzan nahīñ tūfān-e-ārzū
Takrā.e kis se mauj ki sāhil nahīñ rahā

musāfiroñ pe 'musavvir' na jaane kyā biitī
safīna aayā hai sāhil pe lauT kar tanhā

ret abhī pichhle makānoñ kī na vāpas aa.ī thī
phir lab-e-sāhil gharauñdā kar gayā ta.amīr kaun

maiñ to huuñ parda-e-āġhosh-e-tūfān-e-fanā
ḳhud Dubo detā huuñ kashtī qurb sāhil dekh kar

gahrā.ī se motī laane vāloñ kā ye haal huā
sāhil kī āġhosh meñ baiThe lahreñ ginte rahte haiñ

shab ke dariyā meñ uThtī hai ik mauj-e-māzī balā-ḳhez kyuuñ
lauT jaatī hai kyuuñ sāhil-hāl se sab miTātī huī

baḳhīl aisā nahīñ dekhā hai dariyā
ki ham sāhil pe pyāse so rahe haiñ

mere alāva kis ko ḳhabar hai lekin maiñ chup huuñ
sāhil se kyuuñ maujoñ ne Takrānā chhoḌā thā

bahr-e-ġham se paar hone ke liye
maut ko sāhil banāyā jā.egā

yā to kushī Dūbtī thī yā chalī sāhil se duur
vaa.e nākāmī phirī bhī to havā ulTī phirī

kināra hai koī is kā na is kā koī sāhil hai
mohabbat ek bahr-e-be-karāñ mālūm hotī hai

Dūbūñgā gar hai mere muqaddar meñ Dūbnā
ġhavvās-e-bahr-e-ishq ko sāhil se kyā ġharaz

Dūbte haiñ safīne sāhil par
sab ināyat ye nā-ḳhudā kī hai