Tags-Sahil

ubharnā ho jahāñ jī chāhtā hai Duub marne ko
jahāñ uThtī hoñ maujeñ ham vahāñ sāhil samajhte haiñ

sāhil kī bastiyoñ kā saarā ghamanD TuuTā
sailāb ne tamāñcha jab taan kar diyā hai

har taraf hadd-e-nazar tak silsila paanī kā hai
kyā kaheñ sāhil se koī rābta paanī kā hai

vo motī huuñ jo kho jaatā hai sāhil meñ samundar ke
vo daana huuñ bikhar ke duur hotā hai jo ḳhirman se

aag meñ lipTā huā hadd-e-nazar tak sāhil
hausla Dūbne vāloñ kā baḌhā detā thā

soḳhta kashtī kā malba maiñ mirā dil aur shaam
ġham-zada utre hue dariyā kā sāhil aur shaam

ai nāḳhudā ḳhudā pe mujhe chhoḌ kar to dekh
sāhil pe kaun jā ke lage Duub jaa.e kaun

kausar bhī khiñch aa.e to ye niyyat nahīñ bhartī
dariyā-e-havas vo hai ki sāhil nahīñ rakhtā

mai-ḳhāne ko dekhe koī in āñkhoñ se ġhāfil
ik nuur kā dariyā hai ki sāhil nahīñ rakhtā

muttafiq is par sabhī haiñ kyā ḳhudā kyā nāḳhudā
ye safīna ab kahīñ bhī jaa.e sāhil ke sivā

sat.h-e-sāhil na rahī jab koī qīmat in kī
ham ḳhazānoñ ko tah-e-āb uThā kar le aa.e

is samundar pe ik ilzām hī dhar jaanā hai
paas sāhil ke mujhe pyaas se mar jaanā hai

sāhil pe jo khaḌā thā tamāshā banā huā
vo gahre pāniyoñ kā shanāvar lagā mujhe

kitne paanī sar se guzre merī zabāñ na khulī
sāhil sāhil dariyā dariyā maiñ ḳhāmosh rahā

ishq! tujh ko ḳhabar bhī hai? ab ke
tere sāhil se jā lageñge ham

mauj o shorish inqalāb o iztirāb o rust-o-ḳhez
hai mazā sāhil meñ kab jo dūrī-e-sāhil meñ hai

gar qulzum-e-ishq hai be-sāhil ai ḳhizr to be-sāhil hī sahī
jis mauj meñ Duube kashti-e-dil us mauj ko tū sāhil kar de

duur sāhil se koī shoḳh ishārā bhī nahīñ
Dūbne vaale ko tinke kā sahārā bhī nahīñ

maujoñ kī siyāsat se māyūs na ho 'fānī'
girdāb kī har tah meñ sāhil nazar aatā hai

koī pūchhe to sāhil par bharosa karne vāloñ se
agar tūfāñ kī zad meñ aa gayā sāhil to kyā hogā