Tags-Sahil

koī pūchhe to sāhil par bharosa karne vāloñ se
agar tūfāñ kī zad meñ aa gayā sāhil to kyā hogā

ārzū-e-sāhil se ham kinārā kyā karte
jis taraf qadam uThe bahar-e-be-kanār aayā

kashtī ko ḳhudā par chhoḌ bhī de kashtī kā ḳhudā ḳhud hāfiz hai
mushkil to nahīñ in maujoñ meñ bahtā huā sāhil aa jaa.e

samundar meñ utar ke ruḳh havā kā moḌ dete haiñ
kabhī sāhil se tūfāñ kā nazāra ham nahīñ karte

har tamannā-e-sukūn-e-sāhil
uljhī uljhī rahī sailāboñ meñ

sāhil kī ret par maiñ khaḌā sochtā rahā
uljhā thā merā zehn nadī kī havāoñ meñ

mujh ko Thahre hue sāhil se nahīñ thī ummīd
mujh ko bahte hue paanī ne sambhālā hogā

umr meñ us se baḌī thī lekin pahle TuuT ke bikhrī maiñ
sāhil sāhil jazbe the aur dariyā dariyā pahuñchī maiñ

is sāhil par naav paḌī hai us sāhil par māñjhī hai
beach nadī meñ tairtī lāsho pul ban jaao dhāroñ par

dekheñ bach jaatī hai yā Dūbtī hai kashti-e-shauq
sāhil-e-fikr pe ik hashr bapā ho jaise

ziyāda naaz ab kyā kījiye josh-e-javānī par
ki ye tūfāñ bhī rafta rafta sāhil hone vaalā hai

is sāhil se us sāhil tak
kyā kahiye kitnī duurī hai

aarzū ke bahr-o-dariyā kī kahānī kyā kahūñ
is kā sāhil aur hai is kā kinārā aur hai

ḳhabar-dār ai subuk-sārān-e-sāhil
ye sāhil hī kabhī mañjdhār bhī hai

tuġhyāniyāñ kuchh aur haiñ maujoñ meñ ret kī
maiñ Dūbtā huuñ ishrat-e-sāhil na kah ise

patthar patthar jot jalegī sāhil sāhil sho.ale hoñge
bhīgī bhīgī sard havā meñ sharmā.egā ThanDā haath

biich sāgar meñ to the hausle maujoñ se buland
aur sāhil pe ik ehsās-e-ziyāñ raqs meñ hai

kyā jaane bahr-e-ishq meñ kitne hue haiñ ġharq
sāhil se sat.h-e-āb ko hamvār dekh kar

kuchh na sāhil pe milegā ki 'shifā' us ne to
dur-e-yaktā ke liye bahr khañgāle hoñge

utarne vaale safīnoñ meñ chhed karte ga.e
Dubo ga.e mujhe sāhil pe mehrbāñ mere