Tags-Sahil

ain dariyā kā talātum to rahā sāhil tak
ho gayā qahr vo tūfān jo sāhil se uThā

ye tūfāñ-ḳhez maujeñ ye thapeḌe baad o bārāñ ke
safīne ko yūñhī kahte raho sāhil bhī aa.egā

ahl-e-sāhil ro rahe haiñ qatre qatre ke liye
zarf-e-dariyā ro rahā hai zarf-e-dariyā dekh kar

vo aañkh ajab rau meñ bahā le ga.ī ham ko
ik mauj thī sāhil se uThā le ga.ī ham ko

ye dil vāloñ ko ta.alīm-e-sujūd pā-e-jānāñ hai
sar-e-har-mauj ko barpā-e-sāhil dekhne vaale

Dūbne vaalī thī kashtī jaan kī
ab to sāhil kā kinārā mil gayā

suno samundar kī shoḳh lahro havā.eñ Thahrī haiñ tum bhī Thahro
vo duur sāhil pe ek bachcha abhī gharauñde banā rahā hai

Dūbtā jaatā hai har shaḳhs sar-e-sāhil-e-shab
baḌhtī jaatī hai magar shab se aqīdat merī

barsoñ guzar ga.e magar ab tak nahīñ bujhī
kitnī ajiib ret ke sāhil kī pyaas hai

ai iztirāb-e-mauj-o-talātum tire sivā
vaj.h-e-sukūñ vo kaun hai sāhil kaheñ jise

hamāre dars pe ġhairoñ ne pā liyā sāhil
hamāre apne safīne ko nāḳhudā na milā

ye uljhan to bas uljhan hai kuchh paanā hai kuchh khonā hai
sāhil kī tamannā karte hue maujoñ kī ravānī kaise likhūñ

kuchh log dhuup piite haiñ sāhil pe leT kar
tūfān tak agar kabhī is kī ḳhabar ga.ī

jinheñ shauq-e-talab ne quvvat-e-bāzū atā kī hai
talātum-ḳhez tuġhyānī ko vo sāhil samajhte haiñ

dariyā meñ gir paḌā jo mirā ashk ek garm
but-ḳhāne lab pe ho ga.e sāhil ke chaar pāñch

sar pe tūfāñ ne uThāyā hai use
jis ne sāhil se kinārā kar liyā

har lahr ke siine se lipaTtā hai mirā dil
mañjdhār ke is paar ho sāhil kā nishāñ bhī

sab meñ shāmil hai
lab-e-sāhil pe ujle sañg-rezo kā vajūd

jo bhañvar ko samajhte haiñ sāhil
aise bhī log haiñ safīnoñ meñ

is tarah ham ne samundar ko pilāyā paanī
apnī kashtī kisī sāhil pe na moḌī ham ne