Tags-Sahil

allāh re ye mere safīne kā muqaddar
do haath hī sāhil thā ki tūfān chaḌhā tez

aag lagī thī dariyā meñ
lekin sāhil chup sā thā

sailāb-e-zindagī ke sahāre baḌhe chalo
sāhil pe rahne vāloñ kā nām-o-nishāñ nahīñ

sāhil pe samundar ke kuchh der Thahar jā.ūñ
mumkin hai ki maujoñ ke māthe pe ubhar jā.ūñ

jo kahte the ki gar Duube bhī to ik saath Dūbeñge
vo ham ko chhoḌ kar mañjdhār meñ sāhil pe jā pahuñche

reg-e-sāhil kī tab-o-tāb kī dushman Thahrī
lahr jo bhī pas-e-dīvār-e-havā se aa.ī

ġhaltīda-o-pechīda-o-āshufta sī ik mauj
sāhil ko liye zad meñ hai sāhil se bahut duur

vo vaqt aa gayā hai ki sāhil ko chhoḌ kar
gahre samundaroñ meñ utar jaanā chāhiye

raat din tū hai mirī āġhosh meñ
maiñ tirā sāhil mirā dariyā hai tū

ye dil kī be-qarārī ḳhaak ho kar bhī na jā.egī
sunātī hai lab-e-sāhil se ye reg-e-ravāñ mujh ko

raat bhar ḳhvāb ke dariyā meñ saverā dekhā
din ke sāhil pe jo utre to añdherā dekhā

sāhil pe sahme sahme zamāna guzar gayā
dariyā kā aaj zer-o-zabar dekhte chaleñ

laakh be-yār-o-madadgār phire sāhil par
qaid rahtī hai sadaf meñ hī guhar kī tārīḳh

le chalī haiñ sāhil par mujh ko sar-phirī maujeñ
jaise ye bhī tūfāñ kī ho koī na.ī sāzish

kyā kaheñ dīda-varo ham to vo dariyā-dil haiñ
kabhī sāhil ko bhī pyāsā nahīñ rahne dete

are o tishna-lab ye pyaas ye andāz piine kā
samundar ghaTte ghaTte duur tak sāhil na ban jaa.e

kahte haiñ unhīñ ko dushman-e-dil hai naam usī kā nāseh bhī
vo log jo rah kar sāhil par mañjdhār kī bāteñ karte haiñ

kashāñ-kashāñ lab-e-sāhil utar ga.ī mujh meñ
udaas raat samundar kī vus.ateñ le kar

uḌā dehlī se aur uḌ kar maiñ kalkatta meñ aa pahuñchā
thakā-hārā huā sāhil pe jaise nāḳhudā pahuñchā

harīf-e-joshish-e-dariyā nahīñ ḳhuddārī-e-sāhil
jahāñ saaqī ho tū bātil hai da.avā hoshiyārī kā