Tags-Sahil

kiyā hai yaad mujhe mere ba.ad duniyā ne
huā jo ġharq to sāhil qarīb aane lagā

vo ai 'sīmāb' kyuuñ sargashta-e-tasnīm-o-jannat ho
mayassar jis ko sair-e-tāj hai jamunā kā sāhil hai

shāyad koī lahr lene aa.e
sāhil ke qarīb ghar banā.ūñ

dekh le sāhil se jī bhar ke machaltī lahr ko
is taraf kuchh der meñ mauj-e-fanā bhī aa.egī

shor sāhil kā samundar meñ na thā
maiñ ne dekhā mire andar meñ na thā

Dūbte Dūbte āvāz tirī sun jā.ūñ
āḳhirī baar to sāhil se sadā de mujh ko

ab to bhañvar meñ Duub ke rahnā hai har taraf
sāhil se duur apnā nishāñ is qadar huā

har mauj se ulajhtī huī kheltī huī
sāhil pe laa.ī kashti-e-umr-e-ravāñ mujhe

ufuq ke aa.ine meñ ho na ho dhāre ke saa.e meñ
nazar aatī haiñ tūfānoñ kī sarhad jaise sāhil se

jab shaam utartī hai kyā dil pe guzartī hai
sāhil ne bahut pūchhā ḳhāmosh rahā paanī

ham chaTāneñ haiñ koī ret ke sāhil to nahī
shauq se shahr-panāhoñ meñ lagā do ham ko

lauT to aa.ī hai sāhil pe magar ḳhauf meñ hai
kashtī kī aañkh se utrā nahīñ mañjhdār kā rañg

kahte haiñ jis ko maut hai vaqfa hayāt kā
dariyā-e-zīst ek hai sāhil jagah jagah

shāyad idhar se guzre phir bhī tirā safīna
baiThā huā huuñ sāhil par nai-ba-lab kabhī kā

sab nishān qadmoñ ke miT ga.e the sāhil se
kis ke vāste āḳhir Dūbtā ubhartā maiñ

sāhil pe jalā de jo palaTne kā vasīla
ab aisā jiyālā mire lashkar meñ nahīñ hai

maiñ hamesha kī tarah tanhā.ī kī bāhoñ meñ bāheñ Daal kar
raat bhī sāhil pe thā mahv-e-ḳhirām

roz sāhil pe khaḌe ho ke yahī sochā hai
maiñ jo pighlī huī rañgīn shafaq kā roġhan

roz sāhil pe khaḌe ho ke yahī dekhā hai
shaam kā pighlā huā surḳh sunahrī roġhan

maiñ hairat o hasrat kā maarā ḳhāmosh khaḌā huuñ sāhil par
dariyā-e-mohabbat kahtā hai aa kuchh bhī nahīñ pāyāb haiñ ham