Tags-Sahil

shor-e-dariyā-e-vafā-e-ishrat ishrat-e-sāhil ke qarīb
ruk ga.e apne qadam aa.e jo manzil ke qarīb

azm ye rakhnā ki gahrā.ī kā siina chiir deñ
aur apne aap ko sāhil pe tanhā dekhnā

ishq hai aisā safar jis kī koī manzil nahīñ
ya.anī ik kashtī ki jis ke vāste sāhil na ho

sūraj se ras bhañvar se tū sāhil kashīd kar
sahrā ke zarre zarre se mahmil kashīd kar

na samundar hai na sāhil na koī kashtī hai
kaise utregā vo us paar zarā dekh to le

kabhī huuñ terī ḳhamoshī ke kaTte sāhil par
kabhī maiñ lauTtī āvāz ke bhañvar meñ thā

reg-e-sāhil pe naqsh baaqī hai
jism vo be-misāl kis kā thā

jo rañg-e-ishq se fāriġh ho us ko dil nahīñ kahte
jo maujoñ se na Takrā.e use sāhil nahīñ kahte

nazroñ se nāptā hai samundar kī vus.ateñ
sāhil pe ik shaḳhs akelā khaḌā huā

sāhil-e-intizār meñ tanhā
yaad vo lahar lahar aa.e mujhe

jāntī haiñ ki ab vidā.ī hai
kashtiyāñ chūmtī haiñ sāhil ko

sāhil se merā paañv phisalne kī der thī
ik mauj-e-be-panāh bahā le ga.ī mujhe

dīdanī hai sāhil par ye ġhurūb kā manzar
bah rahā hai paanī meñ āsmāñ kā sonā bhī

sāhil sāhil daar saje haiñ mauj mauj zanjīreñ haiñ
Dūbne vaale dariyā dariyā jashn manāte rahte haiñ

ye kaalī raat kā dariyā bahā kar le gayā sūraj
hirāsāñ sub.h ke sāhil pe dil tārīkiyoñ se hai

maiñ jab sāhil pe utrā ḳhalq merī muntazir thī
ka.ī din ho ga.e the bādshāh miltā nahīñ thā

jab kashtī sābit-o-sālim thī sāhil kī tamannā kis ko thī
ab aisī shikasta kashtī par sāhil kī tamannā kaun kare

is baat ko kahte hue Darte haiñ safīne
tūfāñ ko ḳhudī dāman-e-sāhil ne havā dī

nā-ḳhudā hosh meñ aa hosh tire ġham to nahīñ
ye to sāhil ke haiñ āsār-e-talātum to nahīñ

ai nigāh-e-shauq tū dhokā na de
vo to hai hadd-e-nazar sāhil nahīñ