Tags-Sahil

jo ab tak naav ye Duubī nahīñ hai
to sāhil par bhī bechainī nahīñ hai

log sāhil pe tamāshā.ī bane baiThe rahe
biich dariyā meñ faqat ham hī akele utre

aane vaalī sub.h ginegī raat ke andhe tūfāñ meñ
kitne sāhil hī par Duube kitne bhañvar ke paar hue

hijrāñ meñ intizār bhī hai us kā muġhtanim
jo Dūbtā ho us ko to sāhil aziiz hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

dāman-e-har-mauj hī apnā to sāhil hai 'azīz'
kaun kahtā hai ki bahr-e-ġham meñ sāhil ek hai

yūrish-e-ālām hai lekin mirā dil ek hai
saiñkaḌoñ maujoñ kī zad meñ aaj sāhil ek hai

kyā tamāshā hai ki baaqī ho samundar kā safar
aur sāhil se kisī roz safīna lag jaa.e

abhī thī tere safīne kī muntazir 'kausar'
ajab lagā tire sāhil se yuuñ phisal jaanā

manzil kī talab saath hī sargarm-e-safar hai
dariyā ho magar halqa-e-sāhil meñ paḌe ho

tumhīñ se bahr-e-hastī meñ ravāñ hai kashtī-e-hastī
agar sāhil bhī so jaa.eñ to dhāro tum na so jaanā

hai yaad ahl-e-vatan yuuñ ki reg-e-sāhil par
girī huī koī machhlī ho jaal se bāhar

sāhil to nazar aayā lekin tūfāñ meñ balā kī shiddat thī
maujoñ ko manāyā laakh magar ham jānib sāhil aa na sake

hamāre hisse meñ aa.ī hai ret sāhil kī
kisī ne chhīn lī vo siip jis meñ gauhar thā

abas DhūñDā kiye ham nā-ḳhudāoñ ko safīnoñ meñ
vo the āsūda-e-sāhil mile sāhil-nashīnoñ meñ

ham chaTānoñ kī tarah sāhil pe Dhāle jā.eñge
phir hameñ sailāb ke dhāre bahā le jā.eñge

gūñjtī rahtī haiñ sāhil kī sadā.eñ mujh meñ
aur samundar mujhe betāb nazar aatā hai

ham to vo haiñ ki jinheñ raas nahīñ koī nagar
kabhī sāhil kabhī girdāb se Dar jaate haiñ

sunā ye thā bahut āsūda haiñ sāhil ke bāshinde
magar TuuTī huī kashtī meñ dariyā paar honā thā

kahīñ na thā vo dariyā jis kā sāhil thā maiñ
aañkh khulī to ik sahrā ke muqābil thā maiñ